Marko Pelinxhi: Partizani i destinuar për kampion, as sot nuk thyhet

Ish- trajneri dhe lojtari i Partizanit, Marko Pelinxhi, për “Panorama Sport” ka bërë analizën e të kuqve në prag të derbit të 147- të të kryeqytetit. Sipas tij, Partizani është i programuar për kampion dhe vjen në derbi më lart se bardheblutë, por duhet të ndryshojë ritmin në vazhdim, duke nisur nga sfida e sotme. Pelinxhi nuk e mendon humbjen e të kuqve sot dhe shpresat për suksesin e Partizanit i shikon tek Ekuban dhe Torasa. Sipas tij, skuadra duhet të vihet në shërbim të Ekuban dhe të bllokojë Karabecin e Merveil te Tirana.

Marko Pelinxhi

Si e shikon derbin
“Partizani vjen në këtë takim i pathyeshëm në 10 përballjet e fundit, kështu që edhe derbin e radhës unë e shikoj pa humbje për ‘demat’. Këtë derbi e shikoj në dy pamje. Partizani është i përgatitur që në fillim për titullin kampion, përpos ngjarjeve që rrodhën me ndryshimet në stolin drejtues. Ndërsa Tirana me ‘gjysmë këmbe’ është përmirësuar shumë, por nuk mund të them për kampion. Partizani i ka vetëm një objektiv, fitimin e titullit, ndonëse eliminimi nga Kupa e ka dëmtuar pak në aspektin psikologjik”.

Ndryshimi i ritmit
“Edhe derbi i radhës taktik do të jetë, por ka një problem. Partizani duhet të ndryshojë pak ritmin. Kemi portier dhe mbrojtje shumë të mirë, edhe mesfushën gjithashtu. Nëse skuadrat e tjera luajnë me një organizator, Partizani ka dy lojtarë shumë të mirë që në çdo moment mund ta organizojnë lojën siç duan ata në çdo sektor të fushës.

Bathën e Trashin i njoh shumë mirë, por nuk besoj se trajneri u thotë që të mos godasin portën kur dalin në pozicion goditës. Pra, shikoj një vonesë në lojën e Partizanit dhe për këtë gjë them se duhet ndryshuar ritmi. Kësaj radhe kam shumë shpresë te Torasa, i cili është një lojtar punëtor, por i mungon efikasiteti para portës, ndonëse në javët e fundit është vënë re se edhe ai ka nisur të godasë.

Vërtet janë ndryshuar shumë gjëra për mirë te Partizani, por për mua ky ekip akoma nuk i ka arritur limitet e veta. Skuadra shumë për të treguar, kjo nuk duhet të vlejë vetëm për derbin, pasi fitimi i titullit është shumë herë më ndryshe se ky takim. Mendoj se ka ardhur koha që suksesi në derbi pa titullin kampion nuk ka asnjë vlerë”.

Nuk humbet
“Humbjen nuk e mendoj në derbin e radhës, ndërsa barazimin po. Përpos ritmit që ka Tirana e Mirel Josës, Partizani i ka mundësitë më të shumta për ta fituar edhe këtë duel. Tiranës mund t’i mbulosh Karabecin dhe Merveil, ndërsa te Partizani janë rreth katër lojtarë që duhen markuar në çdo moment, si Batha dhe Trashi, lojtarët anësorë, si dhe Ekuban që është një sulmues klasik, por sakrifikohet shumë në fazën mbrojtëse. Pozitiv për Partizanin është edhe mungesa e Asion Dajës, i cili në fazën e parë ishte një nga më të mirët për Tiranën”.

Trajnerët
“Kam përshtypjen që ritmin e lojës të dy trajnerët do t’ia imponojnë njëri-tjetrit. Në mentalitet Starova mund të jetë pak më i tërhequr, ndërsa Josa nuk është shumë i tërhequr në vendosje dhe gjithnjë kërkon që të sulmojë. Shpresoj që Partizani të shënojë gol i pari, pasi do ta ketë shumë më të lehtë punën pastaj për të menaxhuar ndeshjen dhe për të mos u mundur”.

Pelinxhi Partizani

Skema me dy mbrojtës
Në ndeshjet e fundit, Starova ka aplikuar një skemë me dy mbrojtës qendre, ndërsa lojtarët e krahut aktivizohen në mesfushë. Për këtë skemë, Pelinxhi u shpreh: “Është një skemë që nuk i humb vlera në asnjë kohë, ku të ashtuquajturit mbrojtësit anësorë dalin shumë para në fazën sulmuese. Kjo është një skemë që është përdorur dhe aplikohet akoma nga ekipe të mëdha. Është një lojë që i jep frymëmarrje ekipit”.

Titulli kampion
“Fitimi i titullit kampion nuk është 100% në mentalitetin e ekipit. Por lojtarët të kuptojnë një gjë, se fitimi i titullit kampion nga Partizani bën të lumtur më shumë se gjysmën e Shqipërisë. Kjo është e vërtetë dhe nuk mund ta mohojë askush, se e tillë është shtrirja e mbështetjes për Partizanin. Pra derbi nuk është asgjë para titullit. Duke ditur mungesën e gjatë, Partizani duhet me çdo kusht që të dalë kampion këtë sezon”, vijoi Marko Pelinxhi.

Parashikimi
“Torasa dhe Ekuban mendoj se do të jenë ata që do ta zgjidhin derbin e radhës për Partizanin. Nëse do të isha trajner i Partizanit do t’u jepja urdhër lojtarëve që të gjithë të punojnë për Ekubanin, kjo është ndeshja ku duhet bërë një gjë e tillë. Nëse sulmuesi do të furnizohet shumë nga shokët, e sigurt është fitorja, pasi ai ka treguar se di të zgjidhë edhe i vetëm ndeshjet. Për mua lojtarët e huaj që janë te Partizani në vijën sulmuese i kanë mundësitë individuale për të bërë diferencën”.

E ardhmja
“Në përgjithësi, Partizani po vjen gjithnjë e më shumë duke u konsoliduar, madje edhe stafi teknik e drejtues ka nisur të më pëlqejë, pasi po i rrinë më pranë ekipit. Kontributi i të rinjve duhet të jetë më i madh në ekip, kjo varet nga trajneri, por ka ndryshuar disi mentaliteti pasi po bëhen një pjesë e rëndë- sishme e Partizanit”.

Tifozët
“Tifozët janë një aset i padiskutueshëm për Partizanin. Nuk e di nëse një klub tjetër do t’i luante të gjitha ndeshjet në transfertë, a do të kishte atë përkrahje si Partizani? Tifozët kanë filluar ta dashurojnë më shumë Partizanin dhe nëse fitohet edhe derbi i sotëm, mbështetja do të jetë edhe më e madhe. Kështu që ekipi duhet të fitojë për veten, për objektivin madhor, por edhe për të përligjur mbështetjen e tifozëve”.