Motta jep alarmin në Prokurori, ja ç’tha për drogën shqiptare në Itali

Prokurori i Antimafies së Leçes, Cataldo Motta, dha alarmin dje në Prokurorinë e Përgjithshme për rritjen e sasive të kanabisit nga Shqipëria që kapen në Itali.

Motta u takua dje me kryeprokurorin Adriatik Llalla, drejtuesin e Prokurorisë së Krimeve të Rënda, Besim Hajdarmataj, dhe disa prokurorë të Krimeve të Rënda, që kanë në duar dosje hetimore ndaj grupeve të kultivimit e trafikimit të kanabisit.

Kryeprokurori Llalla me Prokurorin e Antimafies së Leçes, Motta
Kryeprokurori Llalla me Prokurorin e Antimafies së Leçes, Motta
“Drogë më shumë është kapur në Itali gjatë kësaj periudhe”, theksoi kryeprokurori i Antimafies së Leçes në deklaratën që mbajti pas takimit me homologët shqiptarë në Prokurorinë e Përgjithshme.

Mësohet se kryetema e takimit në organin qendror të akuzës kanë qenë hetimet që janë në zhvillim ndaj grupeve kriminale në fushën e drogës. Cataldo Motta mësohet se edhe në takim me kolegët shqiptarë e ka shprehur qartë se është shqetësuese sasia e madhe e drogës që mbërrin në Itali nga Shqipëria.

Pikërisht kjo rritje e sasisë së drogës që trafikohet nga vendi ynë, mësohet se ka qenë edhe shkak i ardhjes së prokurorit italian në Tiranë. Për këtë arsye, takimi i kryeprokurorit të Antimafies së Leçes me kryeprokurorin shqiptar dhe prokurorët e Krimeve të Rënda, ka zgjatur dje më shumë se dy orë.

“Jam i vjetër, por një gjë që besoj është bashkëpunimi. Kemi bërë një verifikim të hetimeve që i kemi të përbashkëta. Hetimet që po kryhen janë për sasitë e drogës së kapura në brigjet italiane, por edhe dosje të tjera, për të cilat nuk mund të flas. Situata është e tillë që duhet një bashkëpunim më i madh se më përpara”, tha prokurori italian pas takimit me kolegët e tij në Tiranë.

HETIMET

Gjatë takimit të djeshëm mësohet se kreu i Prokurorisë së Krimeve të Rënda, prokurori Besim Hajdarmataj, ka kërkuar nga kryeprokurori i Leçës, por edhe nga përfaqësuesit e Interforcës në Tiranë, që t’u japin hetuesve shqiptarë raportin e fluturimeve, filmimet dhe fotografimin e parcelave të hashashit në territorin shqiptar.

Gjatë takimit, kanë qenë të pranishëm edhe prokurorët e Krimeve të Rënda, Gentian Osmani dhe Përparim Kulluri, të cilët kanë diskutuar raste konkrete që janë në hetim për trafikim lëndësh narkotike nga Shqipëria në Itali.

Hetimet në fjalë mësohet se janë duke u zhvilluar në bashkëpunim mes Shqipërisë dhe Italisë, dhe paralelisht në të dyja vendet. Nga ana tjetër, në kohën kur kryeprokurori i Antimafies së Leçes, Cataldo Motta, po takohej me kolegët e tij të Prokurorisë së Përgjithshme në Tiranë, në Itali në zonën e Leçes u arrestuan katër shtetas shqiptarë që po transportonin një sasi prej 800 kilogramësh hashash të nisur me gomone nga Shqipëria në drejtim të vendit fqinj. Gjatë këtij viti mendohet se sasia e kanabisit të kapur në Itali nga Shqipëria është rreth 20 tonë.