Policia bën namin në Dibër, arrestime për drogë dhe armë

Një aksion policor ka çuar në pranga dy persona dhe një të tjerë në hetim në gjendje të lirë. Operacioni është zhvilluar në Dibër. Burime nga policia thanë se në pranga është vënë Maksim Prençi për rreth 3 kg lëndë narkotike dhe për 30 metër kub lëndë drusore dhe Sami Toçi për armën e zjarrit dhe për municionet luftarake.

Ndërsa një tjetër person me inicialet R. M., u procedua penalisht për vjedhje të energjisë elektrike.

Gjatë kontrollit të ushtruar në banesën e Prençit, në fshatin Muhurr, në pjesën e çatisë së shtëpisë u gjet lëndë bimore në gjendje të thatë e dyshuar si lëndë narkotike kanabis sativa, në formën e boçes e futur në dy thasë dhe në tre qese plasmasi, gjithsej rreth 3 kilogramë, e cila u sekuestrua në cilësinë e provës materiale.

Po gjatë kontrollit në territorin para banesës, efektivat e Policisë kanë evidentuar rreth 30 metër kub lëndë drusore të prera në pyll në mënyrë të paligjshme. Menjëherë është njoftuar shërbimi pyjor të cilët kanë marrë masë administrative lekë gjobë dhe konfiskim të lëndës drusore.

Po gjatë operacionit, nisur edhe nga informacionet e marra në rrugë operative u bë arrestimi në flagrancë i shtetasit: Sami Toçi, 58 vjeç, banues në fshatin Arap i Poshtëm- Dibër, për veprën penale “Prodhimi dhe mbajtja pa leje e armëve luftarake dhe e municionit”.

Arrestimi i tij është bërë sepse gjatë kontrollit të ushtruar nga Policia në banesën e këtij shtetasi ju gjetën një armë zjarri automatik model 56 (Kallashnikov), si dhe një sasi prej 130 copë fishkë luftarak model 56 të futura në një thes, të cilat i mbante pa lejen e organeve kopetente.

Arma e zjarrit dhe municioni luftarak u sekuestruan në cilësinë e provës materiale.

Është proceduar penalisht në gjendje të lirë 71-vjeçari me inicialet R. M., lindur dhe banues në Fshatin Muhurr sepse shërbimet e policisë gjatë kontrollit të ushtruar në linjën elektrike që furnizonte banesën e këtij shtetasi kanë konstatuar lidhje të paligjshme të energjisë elektrike, pasi ishte lidhur një tel përcjellës i energjisë elektrike në linjën kryesore dhe furnizonte me energji elektrike jashtë sahatit të banesën e shtetasit R. M.