Rama paralajmëron Metën: Pas zgjedhjeve do të jemi tre bashkëkryetarë

Kryeministri, Edi Rama ka deklaruar gjatë intervistës në “Top Story” në Top Channel se, nuk do të ushtrojë asnjë presion mbi kreun e LSI-së, Ilir Meta për të arritur marrëveshje për zgjedhjet e ardhshme sa më shpejt.rama ne top channel

“E keni kuptuar gabim sepse unë nuk bëj asnjë presion mbi Ilirin dhe ai nuk bën asnjë presion mbi mua”, tha Rama.

Duke komentuar mbi rezultatin e zgjedhjeve të ardhshme, Rama tha se parashikon një koalicion qeverisës me tre bashkëkryetarë, duke iu referuar kreut të PDIU-së, së Shpëtim Idrizit.

Unë parashikoj që pas zgjedhjeve të reja të jenë tre bashkëkryetarë sepse kështu quhen liderët e koalicionit, janë ata që përbëjnë partitë në një koalicion”, tha ai.

Por, i pyetur nëse e barazon Metën me Idrizin, Rama u përgjigj kështu: “Jo! Në drejtim e koalicionit nga pikëpamja politike ju siguroj që mes meje dhe kreut të LSI ka komunikim të vazhdueshëm, ndërveprim dhe harmonizim të të gjitha veprimeve”.

Takim me Putin? Nuk kam asnjë ngurim

Rusia nuk është armik i Shqipërisë, por Rusia ka një strategji të qartë për të rritur ndikimin e saj në Ballkan. Kështu shprehet Kryeministri, Edi Rama i cili thotë se drejtimi Perëndimor i Shqipërisë nuk e pengon që të ketë dialog me Rusinë.

“Rusët nuk janë antishqiptarë. S’kanë asnjë lidhje me ndonjë vokacion antishqiptar”, tha Rama.

“Është e qartë që Rusia ka një strategji për të qenë më influente në rajonin tonë dhe nëse do të bëja një krahasim do të thoja që në anën e BE ka luhatje të qarta për zgjerimin, ndërsa në anën e Rusisë strategjia është e qartë e dukshme e prekshme dhe pa luhatje. Strategjia e Rusisë është koherente dhe këmbëngulëse në çdo veprim dhe kjo duket qartë edhe në Ballkan.”

I pyetur nëse do ta takonte Presidenti rus, Vladimir Putin, Rama u përgjigj se nuk do të nguronte.

“Nuk ka qenë asnjëherë në rendin e ditës një gjë e tillë, por nëse do të vendosej, nuk do të kisha asnjë ngurrim që ta takoja”, u shpreh Rama.