Raul Castro: Betohem se do të mbroj me nder socializmin dhe parimet e Fidel Castro-s

Presidenti kuban, Raul Castro u betua dje në mbrëmje se do të mbronte atdheun dhe socializmin, gjatë një ceremonie homazhezh për babain e revolucionit kuban, Fidel Castro, i cili vdiq më 25 nëntor në moshën 90-vjeçare.

“Para trupit të Fidelit në qendrën heroike të Santiagos, ne betohemi të mbrojmë atdheun dhe socializmin”, deklaroi Raul Castro gjatë ceremonisë së homazheve.

Dhjetëra mijëra kubanezë morën pjesë në këtë ceremoni madhështore për liderin historik të vendit, i cili u nderua për herë të fundit edhe nga disa nga udhëheqësit e botës.

Raul Castro u zotua se do t’i ruante me nder parimet dhe qëllimet e revolucionit komunist të udhëhequr nga Fideli, i cili vdiq më 25 nëntor, në moshën 90 vjecare, shkruan “BBC”.

Ai njoftoi gjithashtu se Kuba do të ndalojë emërtimin e ndonjë monumenti apo rruge me emrin e Fidel Castro, një kërkesë kjo e liderit të ndjerë.

“Udhëheqësi i revolucionit kundërshtonte me forcë çdo manifestim të “kultit të personalitetit”, ka thënë Raul Castro.

Nuk do të vendosen statuja apo buste të Fidel Castro në Kubë, tha ai./SYRI.net/