Reagon Ministri i Drejtësisë mbi kërkesën e Bregut: “S’ka e s’mund të ketë mbrojtje për shtazët!”

Ministri i Drejtësisë, Ylli Manjani ka reaguar lidhur me shkrimin e publikuar pak orë më parë të deputetet Majlinda Bregu. Në postimin e saj në Facebook ajo kërkonte të ngrihej një çështje gjyqësore për gjykatësit i cili ka dhënë Urdhër Mrojtje për 43 vjeçaren Liljana Rukaj që sipas Bregut megjithëse kishte këtë masë mbrojtje u flak nga dritarja nga burri i saj.

Lidhur më këtë Manjani ka theksuar se në rastin konkreti, “burra-shtaza” si ai meritojnë ndëshkim mbi-njerëzor.

Në replikën e tij ai ka theksuar se ndan të njëjtin shqetësim më zonjën Bregu.

Lexoni më poshtë reagimin e tij të plotë.

 

 

Përshëndetje,

Deputetja dhe Kryetarja e Komisionit Parlamentar të Integrimit, zonja Majlinda Bregu ka ngritur një shqetësim në lidhje me ngjarjen e rëndë të Fierit.

Ndaj të njëjtat shqetësime me zonjën Bregu. Ngjarja është tepër e rëndë aq sa i tejkalon kufijtë e njerëzores! “Burrë-shtaza” që e ka kryer këtë krim meriton pa dyshim një ndëshkim mbi-njerëzor!

Në këtë moment nuk di shumë detaje për çështjen e lëshimit të urdhërit të ekzekutimit, por pas një interesimi on line të personelit të Ministrisë, del gjykata e Fierit ka pranuar edhe provizorisht edhe përfundimisht kërkesën e zonjës së ndjerë tashmë.

Do të doja të kisha një informacion shterrues për pyetjet e zonjës Bregu, por në këtë moment pyetjet që ajo ngre janë edhe të miat.

Pra pyetjet; Përse megjithë urdhërin e mbrotjes e ndjera jetonte përsëri me burrin agresor?! Kush ka gabuar gjykata që ka lëshuar urdhërin apo zbatuesit e atij Urdhëri?!

Megjithë statusin ende të paqartë ligjor, në këtë situatë post-reformë ( askush nuk e di tashmë nëse duhen zbatuar ligjet e reja, që kanë hyrë në fuqi por nuk zbatohen dot, apo do vazhdohet me ligjet e vjetra!!), do te çel nesër një proces hetimor Administrativ, për të sqaruar këto pyetje. Në çdo rast ky hetim do sqarojë edhe përgjegjësitë përkatëse.

Ekziston gjithashtu një rrugë tjetër më e shpejtë, hetimi Penal që besoj ka nisur tashmë!

Prandaj i kërkoj që sot, Prokurorisë së Fierit të përfshijë në hetim edhe procesin e lëshimit të Udhërave të Mbrotjes! Prokuroria ka mundësinë ligjore të sqarimit dhe të veprimit të shpejtë për çdo person përgjegjës!

Sidoqoftë, hetimi ynë Administrativ do fillojë nesër!

Duhet mbyllur njëherë e mirë shtegu i “shtázve” që dhunojnë familjet e tyre! S’ka e s’mund të ketë mbrojtje për shtazët! Mbrojtja është paraparë për njerëzit!

Me këtë rast shpreh ngushëllimet e mia më të sinqerta për humbjen e jetës së një gruaje, nënë e dy fëmijëve!