Reforma në drejtësi, Rama: Të pastrojë gjyqtarët. Lu: Efektet e para t’i japë te politika

TIRANE- Zbatimi i reformës në drejtësi dhe lufta ndaj korrupsionit kanë ulur në një tryezë të përbashkët kryeministrin Edi Rama dhe ambasadorin e SHBA në vendin tonë, Donald Lu. Në simpoziumin antikorrupsion, kreu i Qeverisë theksoi se çelësi për të luftuar korrupsionin është reforma në drejtësi. Rama tha se realizimi i kësaj reforme duhet të fillojë së pari nga pastrimi i sistemit të drejtësisë, e cili sipas tij është kthyer “në një pazar”.

“Kur flasim për korrupsionin kemi tendencën që gjithçka ta lidhim me denoncimin, hetimin dhe gjykimin, dhe patjetër kjo bën një domosdoshmëri të hershme të shoqërisë sonë: reformën në drejtësi dhe transformimin rrënjësor të drejtësisë, një sistem që është kthyer në një pazar të madh ku drejtësia blihet dhe shitet. Por drejtësia mund të kthehet në një sistem ku garancia kushtetuese e barazisë përpara ligjit bëhet e mundur. Ne kemi ndërmarrë një rrugë reformash të mëdha e të thella që synojnë ndërtimin e sistemeve në çdo sektor, ku alternativa e korrupsionit luftohet përmes një cilësie të re të institucioneve dhe shërbimit që ato ofrojnë”, tha Rama.

Ndërsa, ambasadori Lu tha se reforma në drejtësi duhet të japë më parë efektet tek politikanët e korruptuar, duke u shprehur se “duhet të presim që politikanë të korruptuar nga e majta dhe e djathta të dalin përpara drejtësisë”.

“Politikanët e korruptuar kanë frikë nga reforma në drejtësi”, u shpreh Lu.

Sakaq, ambasadori amerikan u shpreh se shqiptarët përballen me korrupsionin, duke parë raste sesi gjykatës dhe prokurorë kërkojnë para, seks apo favore në këmbim të vendimeve korruptive.

Duke u ndalur tek dy institucionet e reja të drejtësisë, SPAK dhe BKH, Lu u shpreh se funksionimi i këtyre institucioneve varet nga pritshmëria që shqiptarët duhet të kenë.

“Me zbatimin e reformës në drejtësi, trafikantët e drogës duhet të frikësohen. Ata që po përpiqen të vonojnë reformën në drejtësi, janë të frikësuar nga ajo”, tha Lu.

lu-655x356

DEKLARATA E AMBASADORIT LU
Në SHBA ka një rast korrupsioni që u zbulua në 2008. Ai përfshinte 2 gjykatës që morën mbi 2.6 mln dollarë ryshfet nga burgjet private për të mitur në këmbim të dënimeve të rënda për t’i mbajtur burgjet plot. Një prej viktimave të këtij korrupsioni ishte një 17 vjeçare që në 2007 postoi në rrjetet sociale një shaka me nëndrejtorin e gjimnazit të saj. Ndonëse shënimi tregonte se ishte një shaka, gjykatësi e dënoi më 3 muaj për ngacmim. Prindërit e panë të tmerruar tek e morën me pranga në duar. Mbi 2 mijë të mitur mund të jenë burgosur padrejtësisht nga këta gjykatës të korruptuar.

E përdor këtë shembull për të treguar kostot e tmerrshme njerëzore të korrupsionit në nivele të lartë.
Në Shqipëri çdo familje ka një histori për të treguar sesi korrupsioni i ka prekur jetën. Disa ankohen për inspektorë tatimore të pangopur që i detyrojnë të mbyllin bizneset. Të tjerë flasin për biznesmenë të korruptuar që krijojnë monopole në sektorin farmaceutik ose që kontrollojnë politikanë për të ndikuar në një tender. Ose sesi gjykatës ose prokurorë kërkojnë para, seks ose favore për një vendim gjyqësor korruptiv.

Në korrik kuvendi i bëri popullit shqiptar një dhuratë. Miratimin e ndryshimeve kushtetuese për krijimin e SPAK dhe BKH. Për herë të parë në historinë e Shqipërisë do të sigurojnë një kapacitet të pavarur të hetimit për të kapur krerët e krimit të organizuar dhe zyrtarë të lartë të korruptuar. Ata do ta bëjnë këtë me mbështetjen e qeverisë së SHBA.

Kjo duhet të funksionojë vetëm nëse populli shqiptar ka pritshmëri të lartë dhe kërkon rezultate nga këto institucione. Ju duhet të prisni që shumë kontrabandistë të drogës dhe krerë të krimit të organizuar do të futen në burg.

Duhet të prisni që politikanë të lartë të korruptuar nga e djathta dhe e majta do të përballen me drejtësinë. Duhet të prisni që kontrabandistë droge, krerë të krimit të organizuar dhe krerë të gjykatës të korruptuar të jenë të frikësuar.

Shohim prova se këta persona janë të frikësuar dhe po përpiqen të luftojnë kundër kësaj reforme. Për shkak të frikës ata po sajojnë histori dhe thonë gënjeshtra për ambasadoren e BE, EURALIUS dhe Gjykatën Kushtetuese.

Gjykata ka dërguar tashmë një përkthim të rishikuar në Komisionin e Venecias dhe asnjë nga dallimet e përkthimit nuk ishte propozuar.

Të gjithë partitë politike e kanë vënë besimin në gjykimin e Komisionit të Venecias. Jemi në pritje opinionit të tij, i cili do të ndihmojë në udhëzimin e Shqipërisë për zbatimin e reformës në drejtësi.

(el.sp/BalkanWeb)