Rritet numri i meshkujve të prekur nga SIDA

Krahasuar me një vit më parë në qytetin e Elbasanit është rritur numuri i personave të prekur me Sida, ku nga 51 që ka qenë një vit më parë ka shkuar në 60.

Sipas specialistëve të Drejtorisë së Shëndetit Publik të cilët kryejnë rregullisht analizat për këtë virus vdekjeprurës mësohet se vetëm gjatë vitit 2016 janë shtuar 9 raste të këtij virusi, ndërsa vlen të theksohet fakti se pjesa më e madhe e të prekurve janë meshkuj nga zonat rurale dhe shumë pak nga qyteti.

Transmetimi i këtij virusi mësohet se në pjesën më të madhe ka ardhur nga marrëdhëniet seksuale dhe shumë pak nga rrugë të tjera, siç është transfuzioni i gjakut si edhe homoseksualiteti.

Në këtë kuadër Drejtoria e Shëndetit Publik së bashku me Kryqin e Kuq, kanë organizuar në Ditën Ndërkombëtare të Luftës Kundër Sida-s një aktivitet sensibilizues ku i bëjnë thirrje më së shumti të rinjve që ta kryejnë këtë analiza e cila është falas me qëllim mos përhapjen e virusit dhe evitimin e tij në kohë.

Shifrat nuk tregojnë të vërtetën, thotë një burim i DSHP, pasi dyshohet se në këtë qytet ka shumë persona të infektuar. Por ata hezitojnë të kryejnë analizat dhe paragjykojnë reagimin e shoqërisë nëse dalin pozitiv.