SHBA, Obama i hapur për legalizimin: Marijuana duhet trajtuar si cigaret dhe alkooli

Sipas presidentit në ikje të Shteteve të Bashkuara të Amerikës, Barak Obama, përdorimi i marijuanës duhet të trajtohet njësoj si cigaret dhe alkooli.

Në intervistën e fundit dhënë për “Rolling Stone”, Obama e përcakton gjendjen aktuale mbi përdorimin e marijuanës si te “paqëndrueshme”, me disa shtete që e kanë legalizuar atë vetëm për qëllime terapeutike, të tjerë e kanë dekriminalizuar edhe për përdorime rekreative, ndërsa të tjerë vazhdojnë ta ndalojnë atë.

“Gjithmonë kam qenë shumë i qartë për faktin se bindja ime është që duhet të dekurajojmë abuzimin me çdo substancë dhe unë nuk jam ai i cili beson se legalizimi është një ilaç. Por unë gjithashtu besoj se trajtimi i marijuanës si një çështje e shëndetit publik, kështu siç bëjmë për cigaret dhe alkoolin, është mënyra më e zgjuar për t’u përballur me të,” ka thënë presidenti Barack Obama.

Në këtë intervistë të fundit ai megjithatë ka kujtuar se ndryshimi i ligjeve federale mbi marijuanës nuk është një akt që një president mund ta bëjë vetëm, në mënyrë të njëanshme.