Tensionet bërthamore mes dy Koreve, ekspertët: Ka ardhur koha për bisedime direkte

Koreja e Jugut dhe Shtetet e Bashkuara të Amerikës kanë përdorur sanksione dhe masa ndëshkuese për të ndaluar programin e armëve bërthamore të Koresë së Veriut, por nuk ka asnjë dëshmi se përpjekjet e tyre kanë ndryshuar sjelljen e Phenianit në një mënyrë pozitive, deklaroi një eksperti i njohur amerikan për çështjen koreane.

“Nga katër metodat kryesore, duke përfshirë edhe sanksionet që janë zbatuar për të bërë që Koreja e Veriut të heqë dorë nga ambiciet e saj bërthamore, bisedimet e drejtpërdrejta kanë provuar të jenë mënyra e vetme për të ndihmuar në qetësimin e tensioneve në Gadishullin Korean”, tha Bruce Cumings, profesor në Universitetin e Chicagos, gjatë një seminari të mbajtur në Seul.

Seminari u organizua për të përkujtuar 16 vjetorin e fitimit të çmimit Nobel të Paqes nga presidenti i Koresë së Jugut, Kim Dae-jung për përpjekjet e tij të pajtimit me Korenë e Veriut.

Cumings është i njohur për ekspertizën dhe të kuptuarit e thellë të çështjes koreane.

“SHBA-ja dhe aleatja e saj, Koreja e Jugut kanë ndjekur katër metoda për të ndaluar programin bërthamor të Koresë së Veriut si, sanksionet, ndryshimi i regjimit, pritja e pafundme që regjimi të shembet dhe bisedimet e drejtpërdrejta”u shpreh Cumings.

“Vetëm një nga këto metoda ka funksionuar”, vuri në dukje ai, duke iu referuar bisedimeve të drejtpërdrejta.

“Koreja e Veriut është sanksionuar në çdo mënyrë të mundshme që prej Luftës së Koresë, dhe nuk ka asnjë dëshmi se kjo ka ndryshuar sjelljen e tyre në një mënyrë pozitive”, përfundoi Cumings