Tramexani: Manaj ka djegur etapat. E ardhmja? Strakosha

Zevendestrajneri i kombëtares shqiptare të futbollit, Paolo Tramexani, në një intervistë të dhënë për mediat italiane, ka folur edhe për të rinjtë shqiptarë që po luajnë përtej Adriatikut dhe për perspektivën e tyre në klube të rëndësishme apo në kombëtare.

“Kemi disa djem që janë shumë të aftë dhe po fillojnë të merren në konsideratë si shumë të rëndëssishëm në skuadrat e ndryshme të të rinjve në Itali,. Kemi djem te Milani, Atalanta, Inter apo Roma, sa për të përmendur disa skuadra. Janë djem që kanë dëshirë të madhe, uri dhe duke i bashkuar përgatitjen e akademive italiane, jam i bindur se mund të rriten më shumë”, tha Tramezani, i cili është njëkohësisht edhe drejtor teknik në Federatën Shqiptare të Futbollit.

I pyetur rreth Rei Manajt, i cili aktivizohet tashmë në Serinë A, edhe në moshë të re, Tramexani e këshillon lojtarin shqiptar që të japë maksimumin në stërvitje për të përfituar edhe më shumë.

“Ai është një djalosh që e njoh prej 5 vitesh, që kur luante me paratërinjtë e Sampdorias. I bashkohej shpesh të rinjve dhe luante me djem që ishin tre vite më të mëdhenj se ai. Ka treguar se është një sulmues i madh, i ftohtë në metrat e fundit. Në vitet e fundit po luan më pak, fillimisht te Inter e pastaj te Peskara, por është e qartë se nuk ka shumë hapësira. Duhet të mundohet të rritet i qetë, i ka djegur etapat shumë shpejt. E këshilloj të punojë çdo ditë në stërvitje dhe ky do të jetë aspekti më i rëndësishëm për rritjen e tij”, theksoi ai.

Ndërkaq, i pyetur se kush ishte elementi i radhës me perspektive në kombëtaren shqiptare, Tramexani nuk ngurroi të piketonte Thomas Strakoshën.

“Në perspektivë, emri i rëndësishëm i radhës është ai i Strakoshës. Portierit të rritur në sektorin e të rinjve të Lacios, po i jepet mundësia të luajë te bardhekaltrit dhe të rritet në mënyrë mjaft të rëndësishme”, tha Tramexani.