Vatikani nderon Kadri Morinën “Akademik Nderi”

Presidenti i kompanive të sigurimit, “Eurosig” e “Insig”, Z. Kadri Morina, është vlerë- suar në Itali nga Akademia Papale Bonifaciana me titullin “Akademik i Nderit për vitin 2016”, me motivacionin “Për impenjimin e kontributin aktiv kulturor e social, në realizimin e idealeve, vlerave e qëllimeve të kësaj Akademie”. Ky titull vjen pas medaljes që vetë Papa Françesku i dhuroi dy vite më parë Morinës, besimtarit mysliman që i shërbeu drekën në 21 shtatorin e dy viteve më parë, duke vijuar kontributin më tej.

Ceremonia e dorëzimit të çmimit
Gjatë dorëzimit të titullit nga Presidenti i Akademisë Bonifaciana Kavalier, Doktor Sante De Angelis, biznesmeni shqiptar vuri në dukje harmoninë fetare në Shqipëri, e cila është reflektuar edhe në ndihmën e tij për akademinë. “Unë jam mysliman, vij nga një familje praktikuese e besimit mysliman, por si çdo shqiptar, jetojmë në vendin tonë me një frymë vëllazërimi e harmonie fetare, ndaj dhe impenjimet e kontributet e mia nuk kanë njohur asnjë kufi ndarës”. Për Morinën, ky titull nuk i takon vetëm atij, por gjithë shqiptarëve.

“Ndihem shumë krenar, pasi ky çmim nuk më takon vetëm mua tashmë, por gjithë popullit shqiptar, për të gjithë ata njerëz që japin kontributin e tyre në ndihmë të njerëzve në nevojë, në ndihmë të vlerave historike e kulturore të atdheut të tyre. Ky çmim i dedikohet dhe kompanisë sime, rezultateve të saj, gjë që më ka dhënë dhe mua mundësinë të kontribuoj për vlerat historike, kombëtare e kulturore të vendit”, theksoi Presidenti i “Eurosig” e “Insig”, Kadri Morina.

Në ceremoninë e zhvilluar në Anagnit, ku ndodhet selia e kësaj akademie, ose siç njihet ndryshe qyteza e papëve, morën pjesë një sërë personalitetesh: Presidenti i Republikës së Kosovës, Z. Hashim Thaçi, Ambasadorja e Republikës së Kosovës në Romë, Znj. Alma Lame, ishAmbasadori i Shqipërisë në Selinë e Shenjtë, Z. Zef Bushati, Kardinali Edwin Frederick O’Brian, Kardinali Kurt Kock, President i Këshillit të Bashkimit të Krishterë, Arqipeshkvë të ardhur nga e gjithë bota, politikanë, parlamentarë italianë, si dhe përfaqësues së misioneve të ndryshme diplomatike pranë Selisë së Shenjtë.

Çmimi “Bonifacio” mban në historikun e tij vlerësime ndaj personaliteteve të rëndësishme, si Papa Gjon Pali II, Presidentët e Republikës Italiane, Oscar Luigi Scalfaro e Carlo Azeglio Ciampi, nobelistja Rita Levi Montalcini e të tjerë.