VIDEO/ Ja si shpërndahej droga në Athinë nga karteli i shqiptarit Genti

Plot 145 persona janë arrestuar në Athinë si pjesë e një karteli droge të drejtuar nga shqiptarët, lideri i së cilës ishte një shqiptar i quajtur Genti.

Ky i fundit ndodhet në Shqipëri dhe nuk ka qenë asnjëherë në Greqi, sipas mediave greke. Ai ua kishte lënë përgjegjësinë e bandës 3 shqiptarëve dhe 3 grekëve në Athinë. Ndërkohë, anëtarë të tjerë të bandës kanë qenë edhe shtetas afrikanë, të cilët kishin role të tjera.

Ata merreshin me shitjet e kanabisit, kokainës dhe heroinës në zona dhe lagje kryesore të kryeqytetit grek. Video e mëposhtme, e publikuar nga gazeta greke ‘To Vima’, tregon pikërisht momente kur shtetasit afrikanë shesin drogën me doza.

Këto pamje janë përgjime të policëve grekë, të cilët për rreth 8 muaj kanë përgjuar veprimet e kësaj organizate. Sipas policisë së Athinës, karteli i Gentit ka qarkulluar rreth 20 milionë Euro nga trafiku dhe shitja e drogës.

Grupi kriminal përdorte kode për të mos u kuptuar nga policia, kur fliste për drogën dhe objekte të tjera.

“Letra” përdorej për paratë

“Qumësht, miell, kos dhe pulë” përdorej për kokainë

“Djath, proshutë” përdorej për kanabis

“Shkolla” ishte burgu

“Motor” përdorej për armët

“Shteti” përdorej për policinë

“Gaz” përdorej për të shtënat me armë

/SYRI.net/