VIDEO/ Para për provime, arreastohet pedagogia që ktheu studenten në sekserë

Prangoset pedagogia e Universitetit “Ismail Qemali” në Vlorë, e cila ishte shpallur në kërkim pas denoncimit në media ku zbulohet se ajo u merrte ryshfet studentëve në këmbim të notës kaluese. Burime zyrtare nga policia bënë me dije për ‘BalkanWeb’ se është arrestuar Dorina Ndou (Mino), 30 vjeçe, banuese në lagjen “Lirimi”.

Të njëjtat burime theksojnë se Prokuroria ka urdhëruar ndalimin e saj për veprën penale “Korrupsioni pasiv i personave që ushtrojnë funksione publike”. Po punohet për dokumentimin e plotë të ngjarjes dhe zbulimin e bashkëpunëtorëve të tjerë.

DENONCIMI

Kamera e fshehtë e emisionit “Stop”, tregoi rastin sesi pedagogia e Shkencave, Dorina Mino, e cila jep lëndën e ‘Sistemeve Operative’, pranë universitetit “Ismail Qemali” të Vlorës, i jep provimet studentëve të saj kundrejt një pagese prej 15 mijë lekësh të reja për çdo të tillë. Rasti është shënuar në fakultetin e Shkencave Teknike.