Zihen me njëri-tjetrin, pastaj i kthehen policisë, 3 të arrestuar në Lezhë. Ja emrat

Tre burra të dehur nga i njejti fshat i Lezhës, nga Torovica, janë zënë me njeri-tjetrin dje tek rrethrrotullimi i Shëngjinit. Grindja e tyre ka evoluar keq aq sa është dashur të ndërhyjë policia për të ndarë sherrin ndërmjet Zef Nikës, 48 vjeç, Artur Nikës, 42 vjeç dhe Përparim Gjonit, 35 vjeç.

Të palogjikshëm për ç’ka po bënin kundër njeri-tjetrit, çuditërisht ata e kanë mbledhur mendjen që kundër policisë duhet të bashkoheshin, ndaj dhe e kanë kundërshtuar ndërhyrjen e ‘bluve” me forcë fizike.

Atëherë, Policia e Lezhës është detyruar t’i arrestojë sherrxhinjtë dhe dosjet e tyre t’ia dërgojë Prokurorisë së Rrethit Gjyqësor Lezhë për vepren penale ” Kundërshtim i punonjësit të policisë së rendit publik” parashikuar nga neni 236/2 i Kodit Penal.