Zyrtarizohet stadiumi ku do të zhvillohet ndeshja Partizani-Kukësi

Partizani dhe Kukësi do të përballen ndaj njëri-tjetrit në ndeshjen e vlefshme për javën e 14 të Kategorisë Superiore në “Elbasan Arena”. Ky fakt është zyrtarizuar ditën e sotme duke prerë shpresat e tifozëve të kuq se ndaj verilindorëve mund të ndesheshin në kryeqytet. Ndeshja mes Partizanit dhe Kukësit do të luhet ditën e martë në orën 17:00.

Prej disa ditësh çështja e stadiumit ishte pezull duke qënë se Partizani ishte në negociata me Tiranën për stadiumin, por ditën e sotme gjithçka është zyrtarizuar nga FSHF, duke lënë të kuptohet se negociatat mes palëve kanë dështuar. Ndoshta drejtuesit e dy klubeve të kryeqytetit do të ulen sërish në tavolinë për të diskutuar këtë çështje sa i përket ndeshjeve të tjera të mbetura të këtij sezoni, por deri më tani është e qartë që mungon dakordësia.