Analistët rusë: Putin nuk e njeh shtetin e Kosovës, por çka “harruan” ata

Këto reagime erdhën pas disa spekulimeve se Moska mund të njohë Kosovën si pjesë e një marrëveshje me SHBA, ndërsa si kundërshpërblim SHBA do të njihnin aneksimin e Krimesë nga Moska.
Ekspertët rusë thonë se deklarata të tilla duken si një përpjekje e ekspertëve perëndimorë që të “vendosin një pykë” mes Rusisë dhe Serbisë, raporton Sputnjik.

“Kjo duket si një përpjekje për të mbjellë përçarje, sepse skenari që Moska të njohë Kosovën nuk është i mundur, sidomos derisa Putin është në pushtet. Edhe në qoftë se Shtetet e Bashkuara do të vënë përpara një propozim të tillë, Rusia do të refuzojë dhe nuk do të kishte hyrë në këtë lloj të tregtisë, për shkak se ne nuk kemi nevojë për ndihmë nga Washington që Krimea të jetë ruse. Krimea u kthye në përbërjen e Rusisë përmes një referendumi, pavarësisht qëndrimit të SHBA dhe BE. Ne e dinim se çfarë na pret dhe cilat do të jenë pasojat pas kësaj dhe kemi qenë të gatshëm për këtë”, tha këshilltari i drejtorit të Institutit rus të Kërkimeve Strategjike, Igor Pshenichnikov, për Sputnik. Eksperti nuk e përjashton mundësinë që Shtetet e Bashkuara mund të paraqesin ofertën “Krimenë për Kosovën”, por është i bindur se Moska nuk do të pajtohet me këtë në asnjë rrethanë.

“Me njohjen e Kosovës ne do të kishim traëdhtuar aleatin tonë kryesor në Ballkan, dhe ky do të ishte një sinjal për të gjithë ata që janë me disponim separatist në Serbi. Për më tepër, njohja e Kosovës nga Rusia do të thotë shkelje e sistemit ekzistues të së drejtës ndërkombëtare dhe do të ishte një akt i pamoralshëm, prandaj kjo është arsyeja pse Rusia kurrë nuk do t’a bëjë këtë”, përfundon Pshenichnikov.

Edhe në “Klubin Valjdajsk” hidhen poshtë pretendime të tilla.

“Unë mendoj se nuk ka bazë për të filluar çështjen e njohjes së Kosovës. Në fakt, problemi i Kosovës në Ballkan në asnjë mënyrë nuk mund të lidhet me marrëdhëniet ruso-amerikane, dhe për këtë arsye një tregti e këtij lloji është e pamundur. Me fjalë të tjera, Kosova nuk është temë e diskutimit mes dy vendeve, dhe unë nuk besoj se do të jetë në rendin e ditës. Vetëm në rast se situata në Ballkan përkeqësohet me shpejtësi dhe shfaqet një vatër e re zjarri, e cila kërcënon sigurinë rajonale dhe ndërkombëtare, çështja e Kosovës do të mund të aktivizohej në mes Kremlinit dhe Shtëpisë së Bardhë. Por për momentin nuk ka faktorë që mund të ndryshojnë qëndrimin e Kremlinit për integritetin territorial të Serbisë”, tha për Sputnjik Andrej Susencov, drejtor i programit “Klubi Valdajsk”, ekspert për politikën e jashtme amerikane, docent në MGIMO dhe kreu i agjencisë ruse “Politika e jashtme”.

Eksperti thekson se interesat e Serbisë dhe aleatëve të saj të tjerë rusë nuk mund të rrezikohen për shkak të përmirësimit të marrëdhënieve mes Rusisë dhe Shteteve të Bashkuara.

Por duket se ekspertët rusë kanë “harruar” edhe diçka dhe ka të bëjë me faktin se në fakt ishte Putin ai që, viteve të fundit, në njëfarë mënyre kishte ofruar një tregti të tillë duke krahasuar Krimenë me Kosovën dhe ku kishte kririkuar Perëndimin që në rastin e Kosovës “të bardhës i thotë e bardhë”, ndërsa në rastin e Krimesë “të bardhës i thotë e zeze”. Putin kështu në mënyre të drejtpërdrejtë kishte pranuar të drejtën e Kosovës për pavarësi.