Analiza/ Gjatë vitit 2016, 6 vrasje më shumë në kryeqytet

Pavarësisht se viti 2016 është quajtur i suksesshëm nga Policia e Tiranës përsa i përket rendit dhe sigurisë në kryeqytet, gjatë vitit që lamë pas ka pasur 6 vrasje më shumë se një vit më parë dhe 16 aksidente më shumë me pasojë vdekjen.

Në një analizë të detajuar për punën e një viti drejtori i Policisë së Tiranës Ervin Hodaj tha se në raport me vitin 2015 evidentohen 907 ngjarje më pak, dhe rritje e fuqisë zbuluese të policisë me 3%. Sipas tij nga 18 vrasjet e ndodhura në qarkun Tiranë vetëm ajo e Ajet Zeqajt ka mbetur e pa dokumentuar.

Drejtori i Tiranës kërkoi angazhimin maksimal të Policisë Rrugore për uljen e numrin të aksidenteve si dhe ndërgjegjësimin e qytetarëve pasi gjatë vitit 2016, 58 persona të aksidentuar kanë humbur jetën dhe 128 persona janë plagosur rëndë.

Të suksesshme Hodaj e quajti edhe punën e seksionit të narkotikëve ku theksoi se fokusi i punës së tyre ka qenë reduktimi i përdorimit të drogës sidomos në ambiente publike, lokale dhe shkolla.