Berisha paralajmëron: S’mund të ketë zgjedhje, po i nënshtroheni kreut të Meduzës

TIRANE- Edhe për ish-kryeministrin Sali Berisha votimi elektronik është e vetmja rrugë për të pasur zgjedhje demokratike, në të kundërt mund të vihet Në dyshim mbarëvajtja e tyre më 18 qershor, pasi demokratët mund të bojkotojnë.

“Nëse e hidhni poshtë këtë propozim të partive opozitare, zgjedhje nuk mund të ketë. E kuptoni se kush ju drejton ju? Armiku më i egër pas kohës së diktaturës, i votës së shqiptarëve. U drejton njeriu që njësoj si Assadi i Sirisë, ju thotë qytetarëve se për tu votuar unë si kryetar duhet të votoni njëherë në referendum. Po me ju ai mund të bëjë ç’të dojë, por me shqiptarët armiku nuk do të mund të bëjë kurrë”,- tha ai.

Sipas Berishës, personi që e ndalon realizimin e këtij procesi është kryeministri Edi Rama. Sipas tij, Rama është radhitur krah kriminelëve, duke e akuzuar se fshihet pas lirimit të Lulzim Berishës, apo edhe kërkesës së Aldo Bares kundër dënimit të përjetshëm për vrasje. “Nuk e pranon se është angazhuar në një proces kriminal të lirimit të Aldo Bares, Lul Berishës, banditëve, Shullazin. Ju nuk ju pyet fare ju…A e dini ju ç’po bëhet për Hakmarrjen për Drejtësi? Është i regjistruar nga shërbimet partnere në komunikime kriminale…Atëherë do votojmë ne apo do i nënshtrohemi një njeriu që është vënë në krah të Meduzës”,- akuzoi Berisha nga foltorja e Parlamentit.

Në përgjigjen e tij kreu i grupit parlamentar të PS-së, Gramoz Ruçi tha se Berisha mendon që është ende kryetari PD-së, ndërsa e ftoi t’i referohej opinionit që OSBE/ODIHR për mënyrën e votimit.