Bolt i hiqet një e artë olimpike, shkak bëhet…

Usain Bolt i është hequr sot një nga medaljet e tij të arta olimpike, pasi u konfirmua se shoku i tij i skuadrës, Nesta Karter, rezultoi pozitiv gjatë stafetës së 4×100 metrave që përfaqësuesja e Xhamajkës zhvilloi në Lojërat Olimpike 2008 ku zuri vendin e parë.

Kjo nënkupton se Bolt nuk mund të thotë më se ka arritur “treshen e trefishtë”, duke fituar garat e 100, 200 dhe 4×100 metrave në tre Olimpiada radhazi, në vitet 2008, 2012 dhe 2016.

Bolt nuk ka dhënë ende një koment rreth ngjarjes, por një vit më parë, kur u bë e ditur se kishte dyshime për Nesta Karter dhe do të rikryheshin testimet antidoping në analizat që ishin marrë pas asaj gare dhe që ruheshin nga ËADA, ai u tregua më se i kuptueshëm.

“Normalisht të thyhet zemra, për shkak të viteve të punës që ke bërë për të fituar medalje të arta dhe për t’u shpallur kampion, por janë gjëra që mund të ndodhin.

Nëse do të duhet të kthej medaljen, nuk është problem. Unë nga ana ime ndjehem mirë sepse jam i pastër”, deklaroi vitin e kaluar atleti xhamajkan.

31-vjeçari Karter, i cili rezulton të ketë regjistruar edhe kohën e 6 më të mirë të të gjitha kohëve në garën e 100 metrave, ndihmoi asokohe Xhamajkën jo vetëm të merrte medaljen e artë, por edhe të vendoste rekordin e ri botëror prej 37,10 sekondash në stafetën e Lojërave të zhvilluara në Pekin.

Heqja e medaljes së artë nga Xhamajka ia kalon atë katërshes së Trinidad Tobagos: Riçard Tompson, Emanuel Kalender, Keston Bledman dhe Mars Burns. Ndërkaq, Japonisë i kalon medalja e argjendtë ndërsa Brazilit ajo e bronztë./panorama