Buka e thekur shumë shton rrezikun e kancerit

Buka dhe patatet nuk duhen skuqur shumë pasi rrezikojnë që të shkaktojnë kancer.

Sipas BBC, ky është konstatimi i shkencëtarëve.

Ata thonë se buka dhe patatet duhen skuqur derisa të marrin ngjyrë të verdhë të artë dhe jo ngjyrë kafe.

Kur ushqimet skuqen ose piqen për një kohë të gjatë në temperatura të larta, prodhohet një kimikat i rrezikshëm, i quajtur akrilamida.

Agjencia për Standardet Ushqimore në Britani rekomandon që të bëhet kujdes duke shmangur ngjyrën kafe nga këto ushqime.

Megjithatë, Qendra për Kërkimin e Kancerit në Britani thotë se nuk është provuar ende lidhja me njerëzit.

ASU thotë se patatet dhe zhardhokët e tjerë nuk duhen mbajtur në frigorifer.

Temperaturat e ulëta shtojnë nivelin e sheqerit dhe kjo bën të mundur që gjatë gatimit të prodhohet më shumë akrilamidë.

Akrilamida është e pranishme në shumë ushqime, por kryesisht në patatina, bukë, drithërat e mëngjesit, biskota, ëmbëlsira dhe kafe.