Ç’armatosen” 21 familje në 24 orë

TIRANE– Pas thirrjes së ministrit të Brendshëm i Shqipërisë, Saimir Tahiri për dorëzimin vullnetar të armëve që mbahen pa lejen e posaçme nga autoritetet, kanë ardhur edhe reagimet nga qytetarët.

Dorëzimi i armëve ka filluar prej disa ditësh, por gjatë 24 orëve të fundit ky proces është intensifikuar.

Kjo edhe për faktin se ministri Tahiri sqaroi se për të gjithë ata që i dorëzojnë këto armë vullnetarisht, nuk do të ketë pasoja penale.

“Kisha këtë armë në shtëpi, dhe tani do t’ia dorëzoj policisë së shtetit. E dëgjova në televizor apelin”, thotë një nga banorët që kanë dorëzuar armët pa leje.

Kështu, gjatë 24 orëve të fundit në të gjithë vendin janë dorëzuar 21 armë, 3860 fishekë, 3 granata, 19 ndezës dhe 30 krehëra.

Konkretisht në:

Vorë: Dorëzohen në Komisariatin e Policisë Vorë 5 armë zjarri, 1000 fishekë dhe 1 granatë.
Rrogozhinë: Dy banorë i dorëzojnë Specialistëve të Policisë së Zonës dy armë zjarri dhe 100 fishekë.
Has: Dy banorë dorëzojnë në Komisariatin e Policisë Has dy armë zjarri dhe 30 fishekë.
Livadhja, Sarandë: Një tjetër person dorëzon një armë zjarri dhe 120 fishekë në Stacionin e Policisë së Livadhjasë.
Memaliaj: Një banor i zonës dorëzon në Stacionin e Policisë Memaliaj një armë zjarri.
Cërrik, Elbasan: Tre shtetas dorëzojnë në Polici 3 armë zjarri dhe 550 fishekë.
Berat: Dorëzohen në Komisariatet e Policisë Ura Vajgurore dhe Berat edhe 3 armë zjarri, 1420 fishekë, 2 granata, 19 ndezës e 8 krehëra.
Fier: Dorëzohet në Komisariatin e Policisë Fier edhe 1 armë zjarri e 640 fishekë.
Krujë, Durrës: Dorëzohen në Komisariatin e Policisë Krujë edhe 3 armë zjarri të tjera.

“Policia e Shtetit falënderon të gjithë qytetarët për bashkëpunimin në dorëzimin vullnetar të armëve.
Si dhe iu bën thirrje të gjithë atyre që disponojnë armë pa leje që të njoftojnë Policinë me qëllim dorëzimin e armëve pranë Komisariateve dhe Stacioneve të Policisë brenda datës 30 Prill 2017”, thuhet në njoftimin e Policisë.