Dacic akuzon: Shqiptarët ma falsifikuan intervistën

“Prishtina dhe Beogradi lehtësisht mund të bien dakord për shkëmbimin e territoreve”, është cituar Ivica Dacic, në portalin “Presheva jonë”. Nga ana tjetër, Dacic thotë se deklarata ishte një trillim.

Agjencia Presheva jonë ka publikuar një intervistë që thuhet se është me Ivica Dacic, ministër i Punëve të Jashtme të Serbisë. Dacic në këtë intervistë, megjithatë, është plotësisht në kundërshtim me qëndrimin e Serbisë dhe marrëveshjes së Brukselit. Sipas kësaj agjencie, Dacic ka thënë bukvalisht se Serbia ka ranë dakord në shkëmbimin e territorit me Prishtinën dhe se Presheva me Medvegjën i përkasin Kosovës, ndërsa pjesa veriore e Kosovës i takon Serbisë, shkruan “Blic”.

“Unë kurrë nuk kam dhënë intervistë e as deklaratë për atë agjenci. Jam i shokuar”, tha Dacic për “Blic”.

I pyetur nëse ai është keqpërdorur, Dacic u përgjigj se po dhe tregoi arsyen e mundshme për publikimin “intervistës inekzistente”.

“Ndoshta qëllimi është që përpara rinisjes së dialogut përsëri të shkaktohet jostabilitet dhe të fajësohet Qeveria në Beograd. Përndryshe, për nevojën e një zgjidhje të qëndrueshme për Kosovën kam folur me vite dhe për këtë arsye nuk e di pse ata kanë nevojë të trillojnë intervista”, thotë Dacic.

Ai shtoi se negociatorët serbë janë të përkushtuar për dialog dhe për zbatimin e marrëveshjes së Brukselit.

Ndërkohë Gazeta Express përkujton se Dacic vazhdimisht ka cekur “përkufizimin territorial”, si zgjidhje e problemit ndërmjet shqiptarëve dhe serbëve, pa e saktësuar se çka mendon. Megjithatë ka thënë se dialogu eshte dashur të bëhet në mes të Beogradit dhe Tiranës dhe nga kjo fjali mund të konkludohet se ai ka menduar në ndarjen e Kosovës ku një pjesë do t’i bashkohej Serbisë dhe pjesa e mbetur, Shqipërisë.