Debate te “Ligjet” për Avokatin e Popullit/ PD braktis komisionin, Xhafaj: Siç bojkotuan edhe procese të tjera

TIRANE– Është shoqëruar me debate mbledhja e sotme e Komisionit të Ligjeve, ku është diskutuar për Avokatin e Popullit. Deputetët demokratë janë ndalur tek rëndësia e rolit të Avokatit të Popullit edhe në reformën në drejtësi.

Teksa theksoi se Avokati i Popullit duhet të jetë rojtar i interesave të publikut, deputeti Eduard Halimi u shpreh se ky institucion “nuk mund të jetë kurrë zgjedhje e kryeministrit”.

“Avokati i Popullit nuk mund të jetë kurrë zgjedhje e kryeministrit. Ai duhet të jetë rojtar i interesave të publikut. 5 vjet më parë e kërkuat deri në bojkot Avokatin e Popullit. Por sot Avokati i Popullit ka rol edhe më të zgjeruar, ka rol edhe në reformën në drejtësi. Dhe kjo ndërhyrje ka të bëjë me arrogancën e Ramës, nuk mund ta lejojmë, tha Halimi, i cili është larguar nga mbledhja.

Pas kësaj, Komisionin e Ligjeve e kanë bojkotuar edhe deputetët e tjerë të opozitës.

Duke reaguar ndaj kësaj situate të krijuar, kreu i Komisionit Fatmir Xhafaj tha “bojkotojnë siç bojkotuan edhe procese të tjera”.