Dorëzimi vullnetar i armëve, 29 armë e 7 granata u dorëzuan në 24 orë

Në kuadër të nismës së “Dorëzimit vullnetar të armëve”, gjatë 24 orëve të fundit në të gjithë vendin janë dorëzuar 29 armë, 2225 fishekë,  7 granata, 7 ndezës, 12 krehëra, 25 m fitil detonar zjarrpërcjellës, bën me dije Policia e Shtetit.

Gjithashtu policia në njoftimin e saj ka treguar konkretisht sasinë e armëve të dorëzuara në secilin qark:
– Shijak, Durrës: Banorët dorëzojnë 6 armë zjarri, 4 karikatorë dhe 150 fishekë.
– Dajç-Shkodër: Dorëzohen në Komisariatin e Policisë Shkodër, nga banorët e Njësisë Administrative Dajç  8 armë zjarri dhe 640 fishekë.
– Divjakë, Fier: Janë dorëzuar në Komisariatin e Policisë Divjakë 10 armë zjarri dhe 200 fishekë luftarakë.
– Gjirokastër: Dorëzohen nga 2 banorë të zonës së Lunxhërisë edhe 2 armë zjarri e 520 fishekë.
– Librazhd, Elbasan: Tre shtetas dorëzojnë në Komisariatin e Policisë Librazhd 1 pushkë, 715 fishekë, 8 krehëra, 7 granata, 7 ndezës granatash dhe 25 m fitil detonar zjarrpërcjellës.
– Dibër: Dorëzohen dhe dy armë të tjera që mbaheshin pa leje që nga viti 1997.

Policia e Shtetit falenderoi të gjithë qytetarët për bashkëpunimin në dorëzimin vullnetar të armëve dhe gjithashtu u bëri thirrje dhe një herë  të gjithë atyre që disponojnë armë pa leje në banesat e tyre t’i dorëzojnë pranë Komisariateve të Policisë brenda datës 30 Prill.