Flet gruaja e pastorit që u vra për gjakmarrje në Shkodër: Amaneti i fundit i Dritanit

Elona Prroj nuk u vesh si burrë për të vrarë gjakësin, atë që 6 vite më parë i mori padrejtësisht bashkëshortin dhe babain e dy fëmijëve. Ajo është shembulli i një gruaje me zemër të madhe që ka ditur të falë gjakun dhe të vazhdojë misionin e nisur nga Dritan Prroj, si pastore në Kishën Ungjillore të Shkodrës.

“Pasi një person i fisit të tij kreu një vrasje në Shkodër, në emigruam, por për pak kohë Dritani e sfidoi burgosjen e gjakmarrjes dhe nuk pranoi që lirinë që ia kishte dhënë Zoti, ta kushtëzonte për shkak të njeriut. Ai më tha se do kthehemi në Shkodër, dhe unë do dal në rrugë, sepse nuk kam bërë asnjë krim”. Kështu e fillon rrëfimin e saj Elona Prroj, bashkëshortja e Dritan Prrojt, pastorit të vrarë para 6 vitesh të Kishës Ungjillore në Shkodër, në emisionin “Me Zemër të Hapur” në News 24.

Disa vite pas vdekjes, e shoqja Elona tregoi se ka vendosur të bëhet pastore dhe të falë gjakun e të shoqit, ndërsa ka hapur edhe fondacionin “Jo gjakmarrjes, pro jetës”.

“Ne vendosëm të çojmë në vend amanetin e tij: Nëse vritem për gjakmarrje, faleni gjakun tim”,- thotë Elona.

“Për mua kjo ishte pjesa më vështirë. Nuk e përballoja dot që dikush kishte vrarë babain e fëmijëve të mi. Besoja tek falja, por brenda zemrës time e kisha të vështirë ta pranojë”,- u shpreh ajo më tej.

Por duket se ajo e ka gjetur forcën, pasi siç thotë: “Mos falja është si të pish helmin e të presësh tjetrin të vdesë”.

Elona thotë se jo vetëm fjalët që ka thënë ishin një amanet, por edhe projekti që mbante në çantë ditën kur e vranë, për hapjen e fondacionit kundër gjakmarrjes. “Kur është vrarë në çantë kishte Biblën dhe projektin e tij, projekt të çmuar që e çova në fund”.

NGJARJA NË 2010
Vrasja ndodhi në 2010, në lagjen “Vasil Shanto” në rrugën pedonale “Kol Idromeno” ndërsa ka patur mjaft kalimtarë e njerëz që pushojnë në klubet e kësaj rruge muzeale. Dritan Prroj, 28-vjeç ka qen duke lëvizur në këmbë në rrugicën e Gjuhadolit dhe autori Mark Njembza që duket se ka ndjekur lëvizjet e tij, e ka qëlluar me pistoletë në rrugicën e ngushtë. Plumbat kanë goditur dhe 59-vjeçarin Ludovig Marashi, i cili banon në këtë rrugë dhe në atë moment po merrte diçka tek mjeti i tij i parkuar në të djathtë të rrugës. Dritan Prroj i plagosur ka mundur të largohet me vrap dhe ka dalë nga rrugica dhe tek “Dugajet e Reja” është kthyer në të majtë duke hyrë në rrugën Pedonale mjaft të populluar në atë moment dhe për të shpëtuar është futur në një prej lokaleve në të majtë të rrugës. Autori e ka ndjekur nga pas dhe ka arritur ta qëllojë sërish tek dera e lokalit. Dritan Prroj ka rënë pa jetë, prapa derës brenda lokalit, në të djathtë të tij. Autorit Mark Njembza kur ka qëlluar fillimisht i ka renë në tokë karikatori i pistoletës, i cili ka mbetur në vendin e ngjarjes pranë gjakut në rrugën e Gjuhadolit, por ai ka patur një fishek në gojë me të cilin ka qëlluar duke e vrarë viktimën.