Gjykata Supreme në Londër: “Brexit” nuk mund të vijojë pa lejen e Parlamentit

Gjykata Supreme e Britanisë ka vendosur se vetëm Parlamenti ka të drejtë të votojë nenin 50 për të nisur zyrtarisht procesin e Brexit, para se të vihet në zbatim nga Kryeministria May.

Një vendim i tillë do të thotë se kryeministrja Theresa May nuk mund të nisë bisedimet e Brexit me Bashkimin Europian derisa deputetet britanikë të japin mbështetjen me vote në parlament, edhe pse kjo pritet të ndodhe brenda afatit të 31 marsit të vendosur nga qeveria.

Vendimi shënon një goditje të rëndë për qeverinë konservatore, e cila kishte kërkuar të anashkalonte legjislativin.

Gjykata më e fuqishme në vend ka mbështetur vendimin e Gjykatës së Lartë që e konsideron jokushtetuese që Kryeministria britanike, Theresa May, të fillojë zyrtarisht procesin e largimit nga BE-ja pa aprovimin e deputetëve.

Njëmbëdhjetë Gjyqtarët e Gjykatës së Lartë dorëzuan vendimin të martën në mëngjes, pas një seance katër ditore dhjetorin e kaluar.