Inaugurimi i Trump, Basha në Lutjen Kombëtare Ndërfetare, takon edhe senatorin Inhofe

Kryetari i Partisë Demokratike, Lulzim Basha ndodhet në SHBA ku ka marrë pjesë në ceremoninë e inaugurimit të Presidentit amerikan Donald Trump dhe ceremonitë pasuese.

Basha, ka vazhduar të informojë mbështetësit e tij në rrjetet sociale për ceremonitë që është duke ndjekur në SHBA. Kështu, ai ka qenë i pranishëm në Lutjen Kombëtare Ndërfetare në Katedralen e Washingtonit, ku më pas ka folur edhe për mediat amerikane.

“Nder dhe privilegj i rrallë të isha i ftuar në Lutjen Kombëtare Ndërfetare në Katedralen e Washingtonit që përmbylli ceremoninë e inaugurimit të Presidentit Trump.
Tradita e këtij rituali madhështor daton nga inaugurimi i Presidentit të parë të SHBA George Washington.

Udhëheqës shpirtërorë të të gjitha feve lexuan pjesë nga Tora, Bibla, Kurani dhe shkrime te tjera të shenjta dhe u bashkuan në lutje për suksesin e Presidentit Trump dhe administratës së re, si dhe për paqe dhe prosperitet në Amerikë dhe në mbarë botën.
Pas ceremonisë pata rastin të jap përshtypjet e mia në median amerikane mbi inaugurimin e Presidentit Trump, ceremoninë e Lutjes Kombëtare dhe traditën unike shqiptare të bashkëjetesës fetare. Zoti e bekoftë Amerikën! Zoti e bekoftë Shqipërinë!”, shkruan Basha në Facebook.
Basha SHBA

Por lideri i opozitës ka pasur një takim edhe me senatorin amerikan Jim Inhofe, me të cilin siç thotë ai ka folur për programin e PD-së si dhe reformat e nevojshme kundër korrupsionit dhe monopoleve klienteliste që vrasin konkurrencën dhe iniciativën e lirë.

“Takimin e fundit në Kongresin Amerikan e pata me Senatorin Jim Inhofe, Kryetar i Komisionit të Punëve Publike dhe anëtar i Komisionit të Biznesit të Vogël dhe Sipërmarrjes dhe Komitetit të Forcave të Armatosura në Senatin Amerikan.

E njoha senatorin me programin tonë për të mbështetur sipërmarrësit e vegjël dhe te mesëm si gjeneratorët e punësimit. Mora vlerësimet për programin e PD dhe biseduam për ndihmën që SHBA mund të japin për zhvillimin e sipërmarrjes dhe biznesit të vogël në Shqipëri, dhe përmirësimin e kushteve për biznesin.

Në mënyrë të veçantë u ndalëm në reformat e nevojshme kundër korrupsionit dhe monopoleve klienteliste që vrasin konkurrencën dhe iniciativën e lirë. Programet e qeverisë amerikane veçanërisht të USAID mund të na japin një ndihmë të madhe në përpjekjet tona për një ekonomi të çliruar nga korrupsioni dhe presioni qeveritar.

Me Senatorin Inhofe biseduam edhe për luftën kundër krimit të organizuar dhe terrorizmit dhe rëndësinë jetike që Shqipëria të mos kthehet në strehë për grupet ndërkombëtare të krimit të organizuar.
Folëm gjithashtu për situatën politike në rajonin tonë dhe veçanërisht përpjekjet e Kosovës për integrimin e plotë në bashkësinë politike dhe ekonomike botërore”, informon kreu i PD-së.