Ja kush është “Temka”, 77-vjeçari që u vetëdogj me benzinë në Sarandë

SARANDE- Policia e Sarandës ka identifikuar personin që i dha fund jetës pasditen e djeshme në qytetin e Sarandës, duke u vetëdjegur me benzinë. Ai është 77-vjeçari Hetem Seferi, i njohur me pseudonimin “Temka”.

Ngjarja e rëndë është regjistruar pasditen e djeshme rreth orës 17:43, në lagjen nr.4 të qytetit, brenda rrethimit të një banese në rrugën “Mit’hat Hoxha”.

Kanë qenë dy të rinj ata që kanë njoftuar policinë, pasi panë se çfarë po ndodhte në anë të murit.
Policia ka shkuar menjëherë në vendngjarje, por për shkak të djegieve të shumta trupi ishte shkrumbuar tërësisht dhe personi kishte ndërruar jetë.

Trupi i pajetë është dërguar në morgun e spitalit të Sarandës, dhe kanë qenë familjarët e viktimës ata që kanë bërë identifikimin e tij.

Mes lotësh ata thonë se nuk e dinë arsyen që mund të ketë çuar familjarin e tyre drejt këtij akti të rëndë.

Hetem Seferi, i cili prej vitesh ka punuar si këpucar, njihej si një njeri i qetë. Tashmë ai ishte në pension, dhe sipas familjarëve të tij nuk kishte shfaqur shenja depresioni.

Nga këqyrja e trupit nuk rezultojnë shenja dhune mbi 77-vjeçarin, ndërsa policia po vijon hetimet për të zbardhur motivet që e çuar të moshuarin drejt vetëflijimit.