Lezhë, udhëtonin me pistoletë pa leje në makinë, pranga policit dhe pasagjerit

LEZHE- Një punonjës i policisë dhe një 33-vjeçar kanë përfunduar pas hekurave, pasi udhëtonin në makinë me armë pa leje.

Burime zyrtare nga policia e Lezhës pohuan për ‘BalkanWeb’ se në pranga ra nënkomisari Armand Myrta, 41 vjeç, me detyrë specialist për hetimin e krimeve në Komisariatin e Policisë Kukës si dhe Petrit Dema, 33 vjeç.

Të dy këta persona u kapën në vendin e quajtur “Kryqëzimi i Milotit”, gjatë kontrollit të automjetit tip “Mercedes Benz”, me targa AA 350 MB, që drejtohej nga oficeri Myrta ku udhëtonte dhe Dema, ndërsa në sediljen e pasagjerit u gjet dhe një pistoletë. Pas kryerjes së veprimeve paraprake hetimore materialet i kaluan Prokurorisë së Rrethit Gjyqësor Kurbin për veprime të mëtejshme.