Luzerna bllokon Hykën për turqit, por amerikanët e gjejnë zgjidhjen

San Hoze Ërthkuejks nuk do të presë shumë që Luzerna të bindet për ta lënë të lirë Jahmir Hykën. Mediat amerikane bëjnë me dije që, nga sot, ata do të nisin bisedimet me vetë futbollistin për të nënshkruar një parakontratë dhe për ta lënë lojtarin të mbyllë këtë sezon me Luzernën.Kjo, për vetë faktin pasi drejtuesit e skuadrës zvicerane kanë marrë të paktën dy oferta zyrtare nga Turqia. Dy skuadra janë të gatshme që të paguajnë helvetët për kartonin e shqiptarit, kontrata e të cilit me Luzernën përfundon në qershor të këtij viti. Sipas mediave amerikane, ka një dakordësi të futbollistit për të kaluar në kampionatin amerikan dhe tashmë pengesa e vetme është… Luzerna.