Mark Frroku mbetet në burg,ja pse e rrëzoi Gjykata

Gjykata e Tiranës rrëzoi dje kërkesën për lirim nga qelia të ish-deputetit Mark Frroku, i akuzuar si pjesëmarrës në një vrasje të ndodhur në Belgjikë, në vitin 1999, raporton “Panorama”.Ish-zyrtari i lartë qëndron në paraburgim që prej muajit prill të vitit 2015, ndërkohë prej gati një viti ai po përballet me këtë akuzë në gjykatë. Në seancën e së martës, në procesin gjyqësor në ngarkim të tij në gjykatën e kryeqytetit, përmes avokatit të tij mbrojtës, Tonin Prendi, i pandehuri Frroku kërkoi të konstatohej humbja e fuqisë së vendimit të zbatimit të masës së sigurimit “arrest në burg”.

Avokati e argumentoi kërkesën me faktin se kanë kaluar afatet ligjore të parashikuara nga ligji për mbajtjen në paraburgim të të mbrojturit prej tij. “Gjykata duhet të konstatojë humbjen e fuqisë së masës shtrënguese”, ka pretenduar mbrojtësi.

Treshja gjykuese e kësaj çështjeje u shpreh dje në lidhje me këtë kërkesë, gjatë një seance ku nuk ishte i pranishëm vetë i pandehuri Frroku. Gjykata vendosi mospranimin e kërkesës së tij. Në vendimin e ndërmjetëm, Gjykata pretendoi se nuk ka përfunduar afati 12-mujor i parashikuar në ligj.

Sipas Gjykatës, llogaritja e afatit nis me nisjen e gjykimit të çështjes në themel në Shkallën e Parë dhe jo kur dosja ka qenë në Gjykatën e Lartë. Për këtë shkak, i pandehuri Mark Frroku do të vijojë të gjykohet në të njëjtën masë sigurie, atë të “arrestit në burg”. Fillimisht, procedimi penal ndaj Frrokut nisi nga ana e Prokurorisë së Përgjithshme, për shkak të cilësive të tij të atëhershme të veçanta si deputet i Kuvendit.

Pasi Frroku dha dorëheqjen nga posti i tij zyrtar, dosja i kaloi për kompetencë Gjykatës së Tiranës. Aktualisht, procesi gjyqësor në ngarkim të ishdeputetit të akuzuar për “vrasje me paramendim”, kryer në bashkëpunim, “pastrim të produkteve të veprës penale ose veprimtarisë kriminale”, “refuzimi për deklarim, mosdeklarimi, fshehja ose deklarimi i rremë i pasurive të personave të zgjedhur” dhe “ndërtim i paligjshëm” ndodhet në fazën e paraqitjes së provave të mbrojtjes.

Deri në këtë fazë të gjykimit, asnjë dëshmitar i thirrur nga prokuroria në proces nuk ka përfshirë të pandehurin Frroku në vrasjen e Aleksandër Kurtit. Edhe dëshmia e dhënë nga një oficer i policisë belge u zbeh, për shkak se bazohej në disa dëshmi anonime, të cilat nuk u pranuan si provë nga ana e trupit gjykues.