Mediat austriake ngrenë pyetje: Sa i rrezikshëm është Lorenz K.?!

Mediat austriake kanë ngritur shumë pikëpyetje në lidhje me arrestimin e shqiptarit 17-vjeçar, Lorenz K. i cili është në burg për një sulm terrorist të mundshëm në metrotë e Vjenës.
Gazeta “Kurier” ka bërë një artikull ku ngre shumë pyetje për rolin e shqiptarit dhe lidhjen e tij me ISIS-in, të cilave u jep edhe përgjigje.

Sipas kësaj gazete, diçka nuk shkon në këtë histori dhe se ka shumë pikëpyetje për dijeninë e disa mediave të cilat kishin kaq shumë informacion për këtë ngjarje.

Po kështu, ata citojnë edhe ministrin e Brendshëm, që tha se një sulm terrorist ishte gati për të ndodhur, ndërkohë që asnjë bombë nuk është gjetur ende, shkruan “Panorama”.

Cilat janë provat për sulmin terrorist?

Sipas provave, Lorenz K. e bëri të ditur planin e tij për sulm terrorist në një chat në internet. Nga ana tjetër, vetë ministri ka thënë se Lorenz K. kishte kontakte virtuale me rrethe ekstremiste, por nuk e di me saktësi nëse ishte thjesht një vizitor i këtyre faqeve apo anëtar i tyre.

A ka patur bashkëpunëtorë?

Ditën e hënë, një djalë 12-vjeçar u morr në pyetje në lidhje me sulmin e parashikuar. Ai është trajtuar si një simpatizant i Lorenz. K. Ndërkohë, një tjetër shqiptar 21-vjeçar u morr në pyetje në Gjermani si i dyshuar se kishte lidhje me shqiptaro-austriakun. Këto të dhëna i dha vetë i dyshuari dhe se nuk kishte prova për ta vërtetuar historinë.

Si ra në gjurmët e Lorenz K. policia austriake?

Policia austriake ka thënë se për sulmin ka marrë informata nga një shërbim i huaj sekret se mes datave 15 dhe 30 janar pritej një sulm terrorist.

Por ende nuk ka një skemë të qartë se si do të kryej sulmi, a është vërtetë Lorenz K. Ministri tha se do të priten rezultatet e hetimeve.

Ku është bomba me të cilën do të hidhej në erë metroja?

Deri tani dimë që bomba nuk është gjetur. Ka patur raportime se ajo gjendet në Gjermani, por ende nuk është gjetur asnjë bombë.

Cila është lidhja e Lorenz K. me ISIS?

Sipas ministrit të brendshëm, Lorenz K. pranoi se kishte lidhje me ISIS kur u morr në pyetje. Por provat deri tani janë vetëm bisedat e tij në një chat që po hetohet.

A përshtatet profili i Lorenz K. me një xhihadist?

Është fakt tanimë se të gjithë terroristët që kanë kryer sulm në Europë kanë qenë në moshë të re. Ata kanë qenë kryesisht persona me precedentë penalë të mëparshëm dhe me pak shpresa për një të ardhme. Këta persona kanë qenë prehë shumë e lehtë për radikalët islamistë.

Fakti që Lorenz K. kishte manipuluar një 12-vjeçar dhe mund ta përdorte atë për sulm terrorist e bën atë pjesë të organizatës. Gjithashtu, ai mendohet se ka lidhje me një grup kriminal në gjermani, që merret më shumë me drogë dhe trafik femrash.