Ndërprerja e mandatit/ Gjykata Administrative rrëzon kërkesën e Shkëlqim Selamit

TIRANE– Gjykata Administrative ka rrëzuar kërkesën e ish- deputetit Shkëlqim Selami, i cili ankimoi vendimin në Gjykatë për heqjen e mandatit të deputetit nga Komisioni Qendror Zgjedhor, si pasojë e ligjit të dekriminalizmit. Gjykata ka rrëzuar kërkesën e Selamit për pezullim të vendimit të KQZ-së, ndërsa në padinë e tij, ish- deputeti i Vlorës ka kërkuar edhe shfuqizimin e vendimit për mandatin e tij.

Shkëlqim Selami, ka thënë më herët se nuk paragjykon vendimin e KQZ-së, por do të kërkojë të drejtën e tij në të gjitha shkallët e gjyqësorit siç ia garanton ligji.

Ndërkohë para pak ditësh Gjykata Administrative rrëzoi edhe kërkesën për pezullim të vendimit të KQZ-se nga ish- deputeti tjetër që iu hoq mandati, Dashamir Tahiri. Ish- deputeti kërkoi pezullim te vendimit deri në përfundim të hetimeve të prokurorisë.

Komisioni Qendror i Zgjedhjeve, me kërkesë të Prokurorisë shpalli të pavlefshëm dhe vendosi heqjen e mandatit për deputetin e LSI-së, Shkëlqim Selami, atë të PD-së, Dashamir Tahiri, si dhe për kryebashkiakun e Kavajës, Elvis Rroshi. Votat e anëtarëve të KQZ-së për këtë vendim kanë qenë në unanimitet.

KQZ vendosi që në vend të Shkëlqim Selamit nën siglën e LSI në Vlorë, deputet të emërohet Flamur Celaj, ndërsa vendin e ish- deputetit të PD, Dashamir Tahiri ta zërë Edmond Zejno në Kuvendin e Shqipërisë.