Obama u ka çuar palestinezëve 221 milionë dollarë para largimit nga Shtëpia e Bardhë

Administrata Obama në orët e fundit të saj i ka shpërfillur kundërshtimet e republikanëve dhe pa shumë zhurmë i ka dhënë udhëheqësve palestinezë 221 milionë dollarë, që kongresistët republikanë i kishin bllokuar më parë, raporton The Associated Press.
Një zyrtar i Departamentit amerikan të Shtetit dhe disa këshilltarë të kongresistëve kanë thënë se administrata në largim e ka njoftuar Kongresin zyrtarisht se do t’i dërgojë paratë për Autoritetin Palestinez në mëngjesin e së hënës, transmeton Gazeta Express.

Zyrtari ka thënë se ish-sekretari amerikan i Shtetit, John Kerry, ka informuar disa ligjbërës për vendimin e marrë, pak para se ai të largohej nga Departamenti i Shtetit për herë të fundit, të enjten. Këshilltarët kanë thënë se njoftimi me shkrim nga Kerry, i datës 20 janar, i është dërguar Kongresit pak para inaugurimit të presidentit të ri, Donald Trump.

Këshilltarët kanë bërë të ditur se përveç dërgimit të 221 milionë dollarëve për palestinezët, administrata e Barack Obamas po ashtu e ka njoftuar Kongresit të premten se ka vendosur të harxhojë edhe 6 milionë dollarë për punë të jashtme, përfshirë 4 milionë dollarë për programet për ndryshimet klimatike dhe 1.25 milionë dollarë për agjencitë e Organizatës së Kombeve të Bashkuara. /Express/