A po kërcënon Meta nëpërmjet Lesit? Presidenti i Republikës nga LSI, ndryshe nuk ka koalicion

Nikoll Lesi i cili ka një afinitet të madh me kreun e Lëvizjes Socialiste për Integrim Ilir Meta, në gazetën e tij “Koha Jonë” herë shkruan me emrin e tij, e herë me pseudonimin Spiten Pruelli.

Sot në versionin online të gazetës së tij, menjëherë pas rihapjes së debatit në disa media për emrin e presidentit të ri (Mimi Kodheli specifikisht), Lesi ka hedhur një shkrim të firmosur me pseudonimin e tij të preferuar Spiten Prulli, nëpërmjet të cilit paralajmëron Edi Ramën që të mos bëjë lojëra me presidentin e ri të vendit, pasi nëse nuk ja jep Ilir Metës, ta harrojë një marrëveshje me LSI-në për zgjedhjet e ardhshme.

Shkrimi i Koha Jonë:

“Ka filluar debati se kush do të propozojë Presidentin e Republikës. PS apo LSI- shtrohet pyetja. PS-ja synon ta marrë postin e Presidentit, nëse nuk kandidon Ilir Meta. Pra duke ditur se kreu i LSI, Meta, ka deklaruar prerë se do të jetë kryetar i LSI edhe me datë 19 qershor, një ditë pas zgjedhjeve, atëherë selia rozë ka filluar ta quajë pronë të saj emrin e Presidentit të Republikës. Kanë shpërndarë, si gjoja rastësisht, emrin e Mimi Kodhelit, ministres së Mbrojtjes. Mimi është kandidaturë shumë e mirë, porse edhe partitë e tjera kanë emra të pranuar nga publiku. Në këtë rast duket që LSI synon që Presidenti i Republikës të zgjidhet me këtë parlament dhe bile mbetet  si kusht negociatash edhe koalicioni. Dhe ngjitur me këtë parakusht vjen edhe kushti që emri të dalë nga LSI.

Ndonëse Presidenti i Republikës ka me pak kompetenca pas reformës në drejtësi, përsëri është Kryetari i Shtetit. Negociatat PS-LSI nuk vonohen vetëm për këtë kusht. Natyrisht që janë një sërë çështjesh të pa negociuara në raport me të majtën, të cilat nuk kanë pse të mbarten deri me datën finale 18 prill, kur sipas Kodit Zgjedhor detyron partitë  të firmosin koalicionet, nëse duan të mos futen vetëm.

Debati LSI-PS për koalicionin, mos durimi i Kryeministrit Rama, deklarata e tij te Sokol Balla se “tashmë koalicioni do ketë tre koka”, bindja në kupolën rozë se fitojnë me PDIU numrin 71 deputetë, etj po sjell fërkime, të cilat do çojnë në luftë nervash në të majtën e bashkuar, duke mos ndjerë PS dhe LSI se gremina e mos bashkimit është fare afër. Thuhet se PS ka shumë lekë për të blerë votat dhe kanë bindje totale se do ti blejnë, por nuk është kaq e thjeshtë blerja e votës, siç flasin nëpër qoshe ministrat e PS-së. Kjo bindje e PS-së se ka lekë për ti blerë votat bashkë me PDIU mund të sjellë të kundërtën; futjen e vendit në një kolaps pas elektoral, sa nuk dihet më se ku do jetë fundi i gropës. Shqipëria ka nevojë për një palë zgjedhje elektorale pa vjedhje votash, sepse akoma nuk dihet në të vërtetë forca reale e çdo partie politike. Shto këtu se administrata e Presidentit Trump e cila do jetë shumë e ashpër me Edi Ramën nëse prek vota.

Duke u kthyer te Presidenti i Republikës, nëse PS e merr me vota të kudombledhura nëpër sallën e Kuvendit, ka mundësi të shënojë fundin e postit të kryeministrit nga radhët e PS-së pas zgjedhjeve”, shkruan Nikoll Lesi, alias Spiten Pruelli.