Rrëfehet aktorja e ‘Al Pazar’: Ndjesia e mëmësisë, si e mbaj gjallë pasionin në çift

Ardhjen në jetë të vajzës Viktoria për festa e konsideron dhuratën që viti 2016 i bëri asaj. Aktorja e “Portokallisë” dhe “Al Pazar”, Rudina Dembacaj, është bërë nënë për herë të parë pas ceremonisë së dasmës në verën që shkoi. Për martesën e lumtur, emocionet e mëmësisë, dhe rikthimin në ekran, Rudina flet për herë parë për gazetën “Panorama”.Sapo je bërë nënë e vajzës në fund të dhjetorit. Si po e përjeton këtë fazë të jetës, mund t’i përshkruash ditët e para të mëmësisë?

Dita e lindjes, ishte dita më e bukur e jetës sime. Emocion i papërshkrueshëm kur dëgjon zërin e foshnjës tënde herën e parë. Pastaj ditët në vazhdim, marrosesh çdo sekondë e më shumë. Ky, mesa duket, është kulmi i lumturisë.

Ndërkohë ke filluar daljet e para në evente, siç ishte inagurimi i një dyqani fustanesh nusërie. Çfarë po bën për të rikthyer linjat shpejt pas lindjes?

Ishte event ku nuk mund të mungoja. Superfustane nusërie nga Riki Dalal. U uroj sukses mikeshave të mia! Po ushqehem shëndetshëm. Për momentin, gjëja më e rëndësishme për mua është ushqyerja e Viktorias me gji.Bëhesh nënë pas ceremonisë së dasmës në verë, ishte gjithçka e planifikuar?

Dasma u bë në verë, pikërisht sepse po vinte një bebe. Unë nuk bëj plane asnjëherë. Faleminderit Zotit! Jeta ime ka qenë plot lumturi dhe pa plane.

Si u njohe me bashkëshortin?

Ishte rastësi shumë e bukur. U takuam në momentin e duhur për të dy. Sigurisht pa plane, të nesërmen pas një takimi të gjatë, ne të dy e dinim që kjo do të merrte përmasa më të mëdha sesa e kishim menduar. Kam ëndërruar gjithmonë të kthehem plot dëshirë dhe padurim në shtëpi, për ta takuar…Kjo është pika jonë e përbashkët.Një artiste që krijon familjen e saj. Do ta kesh më të thjeshtë apo më të vështirë për të vazhduar karrierën?

Mendoj se njerëzit, e sidomos artistët që kanë mbështetje familjen, janë gjithmonë shumë të suksesshëm.

Po të mbajë gjallë zjarrin e pasionit në çift?

(Qesh) Shumë dashke me dit ti!

Do të rikthehesh në ekran, kur dhe me çfarë programi do të të shohim?

Po, do të rikthehem. Patjetër në gjininë e humorit.

E ke menduar ndonjëherë të heqësh dorë nga televizioni, dhe cili është profesioni tjetër që mund të bësh?

Jo, nuk kam arsye pse ta mendoj. Nëse nuk do të kisha pasur sukses, apo nëse nuk do të më donte publiku, do ta kisha menduar.

Njihesh si një imituese e mirë jo vetëm e femrave të politikës dhe ekranit, por edhe e meshkujve. Të ndodh të imitosh në shtëpi kur je me bashkëshortin, apo darka familjare?

Shpeshherë imitimi i shumë njerëzve më vjen pa dashje. Kur tregoj ndonjë ndodhi me të afërmit, imitimi është pjesë e tregimit. /KLOTILDA HARKA/