Rrëfimi qesharak i Pezës në Top Channel: Si më rrëmbyen dhe më torturuan në 1997

Deputeti socialist Alfred Peza i ftuar në “Top Story” me gazetarin Sokol Balla, tregoi dhe një histori të tij të 1997-s, kur është torturuar deri në vdekje nga policia e asaj kohe si gazetar i “Koha Jonë”.

Alfred Peza gjatë intervistes tregoi edhe historinë kur u mor peng në qytetin e Fierit ndërsa po shoqëronte një gazetar të “Corriere della Sera”, pas djegies së redaksisë së “Koha Jonë”.

Rrefimi i Pezës

“Nuk jam quajtur mik i Berishës, por e falënderoj që kur unë kam qenë gazetar televiziv, më ka ardhur në studio në emisione dhe më ka respektuar, si edhe unë, duke menduar se unë ia kisha falur një histori. Ka qenë një histori që unë e kam emrin të krishterë, por vetë jam mysliman. Ishte një falje prej të krishteri me shpirtin prej myslimani.

Paratë e mia janë bërë me mund, djersë dhe gjak. Po e tregoj sot për herë të parë një histori që nuk e kam treguar kurrë më parë publikisht. Ka qenë viti 1997, kur u vendos gjendja e jashtëzakonshme në datën 2 mars, kur në të gdhirë u dogj redaksia e gazetës “Koha Jonë” me nepalm. Në atë kohë unë isha reporter i gazetës.

Bashkë me ne që shkuam në redaksinë e djegur, ku ishin djegur kompjuterët, fotot, materialet, ishte dhe një gazetar italian, Luigi Ipolitto, i famshëm i “Corriera della Sera”. Kërkoi kush ishte reporter i kronikës, kush e njeh Vlorën. Unë e kisha mbuluar Vlorën. Ai më kërkoi ta shoqëroja për në Vlorë dhe unë pranova ta shoqëroja.

Në Fier na bllokuan rrugën në qendër të qytetit, dy makina pa targa, më rrëmbyen dhe më çuan në Komisariatin e Policisë. Ishte një 40-vjeçar, simpatik me mustaqe. Këtë histori e ka treguar dhe Ipolitto në “Corriere della Sera”, me titullin zhduket gazetari antiregjim, Alfred Peza”.

Ipyetur se aso kohe lajmi që qarkullonte ato ditë në ambientet e gazetarisë ishte se kanë vrarë gazetarin Alfred Peza, ai u përgjigj:

Unë isha i vrarë, sepse ajo që ndodhi pasi më çuan në Komisariat ka qenë një histori tmerri. Disa njerëz me theks verior, mora vesh se ishin mirditorë, më kanë rrahur me shkopinj gome, mbi 1 mijë shkopinj kam arritur të numëroj e më pas më ka rënë të fiktë. Pa shkuar mesnata, në korridore, u duk Belul Çelo, kryetar i PD-së së Fierit, i cili një javë më pas u bë ministër i Brendshëm i qeverisë së Pajtimit Kombëtar të Bashkim Finos.

Në atë moment, ata vunë kapuçat në kokë, më futën pasaportën në xhep dhe më tha njëri prej tyre: kur të të gjejnë më vonë kur të punojnë arat në pranverë, të dinë se kush je. Pas disa minutash, filluan disa lëvizje jo të zakonshme. Më vonë bëj lidhjen me këtë moment.

Gazetari Ipolitto ka shkuar në Tiranë dhe ka mbajtur një konferencë shtypi në “Rogner”. Atje ka qenë kryeredaktori i gazetës, Ben Blushi, i cili rastësisht kishte takuar Genc Pollon. Blushi i thotë Gencit që na keni vrarë gazetarin. Ai ka shkuar te Berisha dhe ia thotë këtë shqetësim të Blushit.

Nuk di se çfarë ka ndodhur, por bërja ndërkombëtare e lajmit për zhdukjen time, bënë që mua më është shpëtuar jeta dhe nuk më hodhën në ara. Por i falënderoj torturuesit dhe xhelatët e mi për një gjë: që nuk më goditën në organet gjenitale dhe në kokë për asnjë rast, nuk e di nëse ishte e llogaritur apo e pavetëdijshme, por unë i kam falur ata.

Në momentin e rrëfimit të këtij momenti, Sokol Balla kujtoi se në atë kohë nisi të qarkullonte lajmi për vrasjen e Alfred Pezës.

Vetë deputeti më pas tregoi se ishte gazetari italian që shpëtoi jetën pasi e kthehu historinë e rrëmbimit të tij në çështje në Tiranë.

“I falënderoj torturuesit e mi, që nuk më goditin në asnjë moment në kokë dhe në organet gjenitale. Nuk e di nëse ka qenë e programuar, por për këtë i kam falur”, përfundoi Peza.