Shkon në 12 numri i të vdekurve nga orteku i borës në Itali

Ekipet e shpëtimit i kanë nxjerrë edhe tre trupa të tjerë gjatë natës nga rrënojat e hotelit në Italinë qendrore, i cili u bë rrafsh me tokë nga një ortek i madh i borës javën që shkoi.

Numri i përgjithshëm i të vdekurve është rritur në 12, njofton Brigada Kombëtare e Zjarrfikësve të Italisë, transmeton Express.

Njëmbëdhjetë njerëz janë shpëtuar deri tani nga brenda dhe përreth hotelit në parkun “Gran Sasso”, disa nga të cilët pasi që kishin mbijetuar dy ditë nën akull dhe rrënoja.

Por, 17 ende janë të zhdukur pas ortekut të borës që goditi hotelin katërkatësh të mërkurën e kaluar, vetëm pak orë pasi që një tërmet e kishte goditur vendin.