Show publik me çeshtjen e Shkëlzen Berishes dhe CEZ, vazhdon

Përmendja e Shkëlzen Berishës nga deputetët e PS në Komisionin Parlamentar që heton marrëveshjen me CEZ, e prishi mbledhjen.

Propozimin për ta thirrur dëshmitar djalin e ish kryeministrit Berisha, e bëri një prej deputetëve që zakonisht qëndron i heshtur në komisione apo në seanca parlamentare, Ervin Koçi.

Demokratët braktisën sallën pak minuta më pas, por para se të dilnin Arben Ristani nuk harroi të përmendë fëmijët e Edi Ramës.

“Në rast se do të vijmë në këto nivele, mund të thërrasim këtu dhe djalin e Kryeministrit të sotëm, ose të bijtë e kujtdo tjetër, dhe ta bëjmë qesharake deri në fund këtë histori”, tha Ristani, para se të dilte nga salla me deputetët e tjerë.

Sipas deputetit të PS-së Ervin Koçi, emri i Shkëlzen Berishës është në e-mailet e drejtuesve të CEZ, dhe është përmendur edhe nga juristi i OSHEE-së, Romeo Kara.

“Zoti deputet, ju duhet të paraqisni një kërkesë me shkrim dhe komisioni do të marrë vendim të ndërmjetëm. Komisioni do të vendosë që personi Shkëlzen Berisha do duhet të dëshmojë para këtij komisioni me rrethanat që janë paraqitur gjatë hetimit. Depozitojeni me shkrim dhe ta miratojmë mbledhjen e ardhshme”, tha Balla.

Më herët Ristani nxori fotot e Romeo Karasë me Izet Haxhinë, duke thënë se dëshmitari kyç i socialistëve është bashkëpunëtor me një kriminel.

“Ju po bëni një shou për publikun. Jeni duke iu referuar një dëshmitari që, përveç atyre që tha kolegia seancën e kaluar, unë kam këtu foto që ka dalë me një njeri që ka vrarë në Shqipëri, ka vrarë deputetin. Keni të bëni me njeriun që është dënuar për vrasjen e deputetit Azem Hajdari. Dëshmitari yt ka dalë në foto me një vrasës. Këto që ti i paraqet si e-maile dhe si prova, këto janë copa letre. Njerëzit që ju thërrisni si dëshmitarë janë bashkëpunëtorë vrasësish dhe mbi këto baza mundoheni të ngrini akuza të rreme”, tha deputeti i opozitës që më pas u largua nga mbledhja me deputetët e PD.

Por edhe pse nuk disponon asnjë prove dhe Shkëlzen Berisha ka mohuar çdo akuzë që ka ardhur nga shoku i vrasësit të Azem Hajdarit, socialistët kërkojnë paraqitjen e tij në komision. Mesa duket Balla në kushtet e konfliktit të interesit kërkon të hakmerret për gjyqet e humbura për shpifje ndaj Shkëlzen Berishës.