Tentoi t’i japë para policit që mos i vendoste gjobë, arrestohet 25-vjeçari

GRAMSH– Specialistët e Sektorit për Krimin Ekonomik dhe Financiar në Drejtorinë Vendore të Policisë Elbasan, në bashkëpunim me efektivat e policisë rrugore në Komisariatin e Policisë Gramsh kanë arrestuar në flagrancë Aurel Mollaymeri, 25 vjeç, banues në Moglicë Korçë.

Sipas policisë, 25-vjecari është arrestuar pasi ka tentuar t’i japë para një punonjësi policie për të mos marrë gjobë. Ai është ndaluar në aksin rrugor Gramsh-Kodovjat, në vendin e quajtur “Parku në Gramsh”, nga Patrulla e Policisë Rrugore, për arsye se ka qenë duke drejtuar mjetin tip Benz me targa AA 191 AT , në shkelje të Kodit Rrugor.

Në momentin e ndalimit, 25-vjecari ka tentuar t’i japë 1000 lekë punonjësit të policisë rrugore për të mos marrë masë administrative për mosvendosje të rripit të sigurimit. Policia sekuestroi në cilësinë e provës materiale automjetin dhe paratë. Materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Korrupsion aktiv i personave që ushtrojnë funksione publike”.