Voltana Ademi: Kjo është hakmarrja e Edi Ramës, meqë s’votohet në Shkodër

“Pra, kjo është alternativa e kësaj qeverie për Shkodrën: Asnjë lek, asnjë fond, asnjë interesim! Në vend të zgjidhjeve për njerëzit, ofrohet dhunë, kordona policie.”

Kështu është shprehur sot, kryebashkiakja e Shkodrës, Voltana Ademi, në rrjetet sociale, duke publikuar edhe këtë fotografi të grevës së nisur pranë prefekturës nga familjet shkodrane të padëmshpërblyera nga qeveria për përmbytjet.

“Të përmbyturit janë në të drejtën e tyre, – thekson Ademi, –  por diskriminohen hapur nga Edi Rama e qeveria e tij që pas braktisjes po tenton të fuse dhe konfliktin në qytetin më të madh të Veriut. Meqe ai nuk votohet në Shkodër, hakmerret dhe çon deri në fund trillet e tij. Nuk i ka bërë mirë llogarite. Shkodra dhe shkodranët nuk jane sunduar me polici e forca të armatosura as në ditët me të këqia të diktatures. është koha që ai të reflektoje, të ndryshoje raportin me Shkodrën, duke respektuar në mënyrë të barabartë të drejtat e çdo individ në këtë vend, e të ushtroje detyrimin që ka si kryeministër.”