Wenger nxehet keq me gjyqtarin, trajneri i Arsenalit rrezikon ndëshkim nga Federata

Trajneri i Arsenalit, Arsène Wenger, është akuzuar të hënën nga Federata Angleze e Futbollit (FA) për veprim anti-sportiv ndaj gjyqtarit të katërt të ndeshjes së Premierligës ndaj Burnley, fituar të dielën (2-1).

“Ai ka debatuar ashpër në minutën e 92-të me gjyqtarin e katert”, bëri të ditur FA nëpërmjet një njoftimi zyrtar.

“Acarimi i tij ka ardhur pas përjashtimit nga ndeshja, duke patur edhe një kontakt fizik me gjyqtarin e katërt”, theksoi Federata.

Të dielën, trajneri francez është përjashtuar nga pankina nga gjyqtari i ndeshjes Jon Moss pas reagimit të tij të ashpër pas një 11-metërshi të akorduar për Burnley në çastet e fundit të ndeshjes.

Wenger, 67 vjeç, i ka ndjekur minutat e fundit të ndeshjes në tunelin e Emirates Stadium. Por, më pas francezi ka kërkuar falje për sjelljen e tij.

Wenger ka kohë deri të enjten në mbremje për t’iu përgjigjur këtyre akuzave.