Zbulohet pas 40 vitesh, incidenti detar që rrezikoi nisjen e Luftës së Tretë Botërore

Përplasja e dy nëndetëseve bërthamore në brigjet e Britanisë gjatë Luftës së Ftohtë, mund të kishte sjellë si pasojë nisjen e Luftës së Tretë Botërore.

Ky fakt është zbuluar nga dokumentet zyrtare të CIA-s të cilat thonë se një nëndetëse amerikane SSBN James Madison, u përplas me një sovjetike, teksa po manovronte në brigjet e Holy Loch në Skoci.

Përplasja serioze ka ndodhur në vitin 1974, kur dy vendet ishin bllokuar në një politikë të ashpër.

Por ky incident i rrezikshëm detar është mbajtur i fshehtë për më shumë se 40 vjet, deri në fillim të këtij muaji kur 13 milionë faqe dokumente të CIA-s u postuan online, raporton Times.

Lajmi mbi “përplasjen sekrete” iu dërgua sekretarit amerikan të shtetit Henry Kissinger, më 3 nëntor 1974.

Image

Sipas ekspertit të armëve bërthamore, Hans Kristensen, përplasja mund të kishte qenë fatale nëse ekuipazhi i njërës prej nëndetëseve, do të mendonte se ishte një sulm dhe do të vendoste të mbrohej duke sulmuar nëndetësen tjetër.