Vlahutin takohet me Vasilin: Të krijohen organe të reja gjyqësore

Kreu i Delegacionit të BE-së në Shqipëri, Ambasadorja Romana Vlahutin, u takua me Ministrin e sapoemëruar të Drejtësisë Z. Petrit Vasili. Gjatë takimit të dyja palët theksuan rëndësinë e reformës së drejtësisë që ka arritur fazën kritike të zbatimit, ndërsa vunë në dukje edhe vazhdimin e saj me punën legjislative.

Mbështetja teknike e BE-së për të gjitha palët shqiptare të përfshira në fushën e gjyqësorit vazhdon përmes misionit EURALIUS IV, si dhe me gjithë projektet dhe binjakëzimet e tjera të BE-së. Koordinimi mes gjithë aktorëve mbetet me rëndësi për të garantuar reflektimin e praktikave më të mira të BE-së në aktet legjislative, ndërsa aktorët me rëndësi si shoqëria civile dhe profesionistët përfshihen në mënyrë aktive me ekspertizën e tyre kombëtare dhe ndërkombëtare.

Për më tepër, Ambasadorja përsëriti se krijimi në mënyrë të qetë i organeve të reja gjyqësore është një ndër hapat më të rëndësishëm në këtë fazë të parë të zbatimit të reformës dhe prandaj kërkon bashkëpunimin konstruktiv të të gjitha palëve të përfshira direkt dhe indirekt. Mbështetja e BE-së për gjithë sektorin e drejtësisë mbetet një përparësi për planin e integrimit të Shqipërisë.