Shtyrja e datës së regjistrimit/ Basha: Harrojeni që të tërhiqemi, fitojmë betejën me çdo kusht

Kryetari i Partisë Demokratike Lulzim Basha ka reaguar pas kërkesës së PS-LSI për shtyrjen e datës së regjistrimit të koalicioneve për zgjedhjet parlamentare.

Kreu i opozitës tha se kjo lëvizje e mazhorancës nuk do të bëjë aspak që opozita të tërhiqet nga kërkesat e saj.

Duke folur nga Çadra e Lirisë, Lulzim Basha këmbënguli në krijimin e një qeverie teknike që do të organizojë zgjedhje të lira dhe të ndershme.

“Ligji është ligj përveç se kur nuk do Edi Rama dhe Ilir Meta. Kodi Zgjedhor thotë se sot është afati i fundit për t’u regjistruar koalicionet. Këta po e fusin vendin në një spirale të rrezikshme.

Shikoni ç’ndodh në Kavajë. Ikën një kriminel dhe kandidon mëkëmbësin e kriminelit. Dhe në funksionit të këmbëmbësit të kriminelit, presion absolut shkollave dhe gjimnazeve në Kavajë. Pse? Se mëkëmbësi i kriminelit duhet të fitojë me çdo kusht, edhe kur s’ka kundërshtarë përpara.

Këtej na del si engjëll dhe kërkon të shtyjë datën e regjistrimit, për të mirën tonë. Zgjedhje të lira e të ndershme do ketë vetëm me një qeveri teknike.

Sa për atë thënien ti me bukë e ne me gurë, po të them që mjalti nuk lahet më shëllirë. Por harroje se do të ketë tërheqje nga ky projekt. Republika e Re po vjen, është e pashmangshme.

Mos kini shpresë se ne do tërhiqemi. Ne do ta fitojmë këtë betejë me çdo kusht”, u shpreh Lulzim Basha.

/SYRI.net/