Zogaj: Kam presupozuar se marrëveshja Rama-Basha do ndalonte shitblerjen, nuk ndodhi

Ish-deputeti i PD-së, Preç Zogaj, flet për situatën në të cilën ndodhet PD-ja, kritikat brenda saj, gabimet e Bashës, arsyet e humbjes në zgjedhje, rolin e ndërkombëtarëve, si dhe për marrëveshjen Rama-Basha.

Në kulmin e zhurmës dhe në një moment kritik për PD-në, Preç Zogaj, përmes një interviste për revistën “Mapo”, u përgjigjet disa pyetjeve që lidhen me të tashmen dhe ardhmen e partisë kryesore të së djathtës, pas humbjes që pësoi kjo pari në zgjedhjet e 25 qershorit.

Zogaj shprehet se kishte menduar se marrëveshja Rama-Basha do ta ndalonte shitblerjen e votës, po kjo nuk ndodhi pasi u ble vota masivisht.

Unë kam presupozuar se marrëveshja Rama-Basha kishte vetëm një kuptim: të ndalonte shitblerjen dhe dhunën. Kjo nuk ndodhi. E vetmja Parti parlamentare që nuk bleu vota dhe nuk ushtroi dhunë ishte PD. PS ishte në ballë të shitblerjes, ndjekur nga LSI dhe mjaft kandidatë të PDIU. Nga kjo pikëpamje kam thënë se Rama preu në besë Bashën. Por Basha nuk ka bërë gabim që e besoi. Ky është mendimi im. Njerëzit jetojnë në besim. Është mizore të mos jetosh në besim, të jetosh gjithnjë në dyshim, që është gjeja më e rëndë që mund të të ndodhë, që të shtyn pa ndjerë në poshtërsi të vogla, siç thotë shkrimtari i madh Jozef Kondrad.” – ka thënë Zogaj mes të tjerash.