Macron ashpërson masat kundër emigrantëve ilegalë

Presidenti francez Emmanuel Macron ka vendosur të ashpërsojë ligjet ndaj refugjatëve dhe emigrantëve ilegale.

Duke folur në një intervistë për gazetarët francezë në pallatin Elize, Macron  tha se emigrantët ilegalë që kryejnë krime në Francë do të dëbohen. Presidenti theksoi se nuk do të bëhen dallime për kategorinë e krimit. Ata do të dëbohen edhe për krimin më të vogël – tha Macron.

Presidenti francez njoftoi ashpërsimin e masave ndaj refugjatëve dhe emigrantëve pa dokumente, pas ngjarjes së 1 tetorit në Marsejë, kur një emigrant ilegal nga Tunizia qëlloi për vdekje me thikë 2 vajza.

Çështja e refugjatëve aktualisht është mjaft e ndjeshme në opinionin publik, jo vetëm në Francë por në gjithë Europën.

Presidenti centrist po luan me kartën e tyre për të përmirësuar popullaritetin e tij, pasi sondazhet e tetorit treguan një rënie prej 16 % të mbështetjes për të nga elektorati francez, krahasuar me 60% që e kishte në qershor.