Do marrim familjarët me vete do bëhemi 500.000 persona

Paralajmërimi: “Do marrim edhe familjarët me vete dhe nuk jemi pak, por 100 mijë studentë. Mesatarisht nga 4 persona për çdo familje, bëhemi mbi 400-500 mijë veta. Kaq njerëz, jo një ligj arsimi, por rrëzojnë një qeveri”

Enida Vërça

Protestës së studentëve të Tiranës, iu bashkuan edhe ata të rretheve. Studentët e Elbasanit dhe Durrësit, u nisën në orët e para të mëngjesit dhe iu bashkëngjitën protestës rreth mesditës. “Ne jemi organizuar, për të mbështetur këtë protestë deri sa ministria të tërhiqet dhe të pranojë pikat që ne kemi parashtruar. Duam përgjysmim të tarifës, rritjen e buxhetit për arsimin, mundësi pagese me këste dhe përmirësim të kushteve në konvikte. Nëse kërkesat nuk plotësohen, do të vazhdojmë protestën, deri në plotësimin e tyre. Nesër do vijmë sërish në Tiranë, protesta do jetë edhe më madhështore. Do marrim edhe familjarët me vete dhe nuk jemi pak, por 100 mijë studentë. Mesatarisht nga 4 persona për çdo familje, bëhemi mbi 400-500 mijë veta. 500 mijë veta, jo një ligj arsimi, por rrëzojnë një qeveri”, tha për “Shekullin”, Albjon Braha, student i vitit të dytë, master profesional, për mësuesi në universitetin e Elbasanit. Një studente e Universitetit të Durrësit tha se iu bashkua protestës me shpresën se do të plotësohen të gjitha kërkesat e parashtruara. “Vendimi i anulimit për provimet e prapambetura, na ka bërë që të shpresojmë që do të plotësohen të gjitha kërkesat e tjera. Ne do jemi dhe nesër këtu, do vazhdojmë të protestojmë, bashkë edhe me familjarët. Do bëhet një protestë edhe më e madhe, deri sa vendimi të merret. Politika nuk ka lidhje në këtë mes, ne jemi studentë dhe thjesht po kërkojmë të drejtat tona”, tha Erislida Hoxha, studente e Gjuhë-Letërsisë, vitit i dytë. Ashtu si në Tiranë, edhe në rrethe, protesta e studentëve filloi në orët e para të mëngjesit. Studentët në Vlorë kanë dalë me pankarta në duar dhe kanë bërë thirrje për ndryshim të situatës në universitet. Ata thanë se janë plotësisht dakord me kërkesat që studentët e Tiranës kanë ngritur. Të shumtë ishin studentët që protestuan, kurse në duar kishin edhe parulla të ndryshme, ku flitej për ulje tarifash. “Me paratë tona blini makina luksoze çdo muaj!”, “Arsimi duhet falas. Studentët kundër Linditës dhe politikanëve të korruptuar!”, “Me paratë tona, fëmijët e tyre studiojnë në Harvard!”, “Për Gjermani edhe një se u mbush!”, shkruhej në disa nga pankartat që studentët e Vlorës mbanin në duar. Po ashtu në protestë kanë dalë edhe studentët e Universitetit “Luigj Gurakuqi”, në Shkodër. Studentët janë vendosur para rektoratit dhe u bënë thirrje qytetarëve të bashkohen. “Bashkohuni me ne! Hajdeni na përkrahni të mbrojmë të drejtat që do të jenë edhe të fëmijëve tuaj!”. Të rinjtë kanë qenë të  vendosur të vijojnë protestat në Shkodër dhe nëse kanë nevojë janë gati t’i bashkohen Tiranës.  Njëzëri ata kanë thirrur: “Duam të drejtat tona! Ata kanë parashtruar vetëm tre kërkesa siç janë: E para është ulja e notes mesatare nga 9 ne 7 për studimet në master dhe doktoraturë si dhe të mundësohet liria e zgjedhjes mes provimit dhe temës së diplomës. Kërkesa e dytë ka të bëjë me rimbursimet për ekspeditat që bëjnë studentët duke kërkuar që të tërhiqen dhe të jenë pjesë e buxhetit të universitetit. Kërkesa e tretë është vënia në funksion e godinës se re të Universitetit të Shkodrës brenda janarit të vitit të ardhshëm. Studentet e Shkodrës shprehen se do te vijojnë protestat deri në plotësimin e këtyre kërkesave. Po ashtu në protestë kanë dalë edhe studentët e Korçës, të cilët kërkojnë plotësim të kërkesave të parashtruara në studentët e Tiranës. Edhe ditën e djeshme, Universiteti i Gjirokastrës, “Eqerem Çabej”, nuk protestoi. Në 50 vjetorin e krijimit të këtij universiteti, rektori Bektash Mema tha se universiteti i Gjirokastrës ka tarifat më të ulëta krahasuar me universitete të tjera në vend. Ky është edhe një motiv që nuk i ka nxjerrë studentët të protestojnë, por të vazhdojnë mësimin rregullisht ne auditorë.

Pedagogu Arben Prendi i  universitetit “Luigj Gurakuqi’ është bashkuar me studentët në protestën që po organizohet në qytetin e Shkodrës. Ai mbështeti protestën ditën e djeshme dhe sugjeroi që kërkesat të shtoheshin dhe protesta të vazhdonte deri në një marrëveshje me shkrim me shtetin, si e vetmja mënyrë që vendimet të merrnin formë ligjore. “ Solidarizohemi me të gjitha kërkesat tuaja, janë të drejta, legjitime, mos u mashtroni nga premtimet me fjalë boshe. E drejta e protestës është e drejtë themelore e njeriut. Mos u frikësoni. Unë do të kisha thënë që të shtoni edhe kërkesa të tjera, sepse tani është momenti që shumica e tyre zgjidhen. Për shembull do të sugjeroja që të hiqet mesatarja, është vendosur nga Ministria e Arsimit pa u konsultuar me universitetin për pranimet e reja, gjë e cila rrezikon mbylljen e disa degëve të universitetit tonë”, tha ai.