Ekspozita ‘Ngjyrat e Politikës’ Argonaut Art Factory

Shkruan:  Kristian Zara, MFA – Elbasan

 

Aty ku artistit i jepet liri të shprehet, aty krijohen mundësitë për reflektim në çdo ndodhi dhe gjendje mbi të cilat artisti hedh këndvështrimin e tij, jo rrallë herë edhe radikal. Nëpërmjet çdo reflektimi, kur ai preket sinqerisht nga menduesi, lindin mundësitë për zhbërjen e çdo problemi, për të rigjetur vlerat, virtytet brenda të cilave jetojnë forca të vyera dhe frytdhënesë për vazhdimësinë e së ardhmes njerëzore.

Ngjyrat e politikës është një ekspozitë në grup nga artistët Shqiptarë, e cila mund të barazpeshohej me përpjekje guximtare brenda tregut të sotshëm te artit e kulturës së vendit.

Përse duhet guxim? Së pari, kjo ekspozitë përbëhet vetëm nga punime në pikturë (vaj). Së dyti, kjo ekspozitë ndërhyn drejtpërdrejtë në analizën e politikës, një analizë kjo ndryshe nga ajo e cila shërbehet prej tre dekadash në kutinë e xhamit mediatik. Për më tej, duke u ndodhur në një klimë artistike ku mbizotëron teknika e re, e ashtuquajtur konceptuale (Media Made Art) në përqasjet artistike, të risjellësh në sipërfaqe pikturën do të cilësohej sikurse kundra rrymë.

A nuk është kjo vlera që të gjithë i bashkangjisin ekzistencës së artit në botën njerëzore? Pra, se sa i nevojshëm është nervi dhe e ndryshmja që një apo disa artistë sjellin në të përditshem e jetëve tona? Kështu që, nëse ky aspekt i artit pamor vlerësohet si diçka e çmuar, atëherë duhet t’i japim mundësinë dhe hapësirën të kultivohet nëpërmjet mbështetjes dhe kurajos që janë të domosdoshme për çdo artist i cili/e cila është si një element-katalit për përparimin dhe ndërtimin e shoqërive tona në vend. Mjafton të imagjinosh një pemë pa fryte që të kuptosh thelbin dhe rëndësinë e artit në vazhdimësinë e qytetërimit njerëzor. Këtë gjë, mundohemi ne si artistë, t’a hedhim brenda çdo reflektimi të nevojshëm të cilin njeriu i sotshëm është e rëndësishme të ndërmarrë ne vetëvete fillimisht.

Atë që Argonaut Art Factory ka nisur të ndërtojë, mund të krahasohet me lëvizjet artistike në fillimet e Artit Modern. Po të kujtojmë lëvizjen artistike DADA, të cilët u ngritën si një frymë kundra rrymës së kohës. Në thelb, të ringresh në sipërfaqe pikturën dhe skulpturën në pellgun e sotshëm të mirë konkretizuar artistik, është e njëjta gjë. Të njëjtat pengesa, mundime, punë dhe vështirësi, por edhe vlera së fundmi. Ky pozicionim here i skajshëm (mbase i imi vetjak që po shkruaj këtë artikull) nuk duhet të shqetësojë askënd dhe asgjë, sepse edhe pas modernizmit piktura ende sot ekziston. Por, ajo që është e rëndësishme të piketohet sot është se kemi nevojë të pozicionohemi, edhe ne të etiketuarit si Art Tradicional, në nivelin më të lartë dhe të dalim në sipërfaqe aty ku merita duhet t’i peshojë të gjithë sipas vlerave dhe rëndësisë përkatëse.

Artistët gjithmon do të gjejnë rrugën për të arritur të komunikojnë me mbarë shoqërinë, edhe sikur ato të mugojnë për shkak të politikave të cilat zaptojnë çdo hapësirë për shprehjen e lirë duke shtyrë përpara vetëm llojin e artit që u shërben vete plan-politikave, ne të tjerët mundemi gjithmon të krijojmë rrugë paralele. Edhe se të lënë mënjanë, nuk do të munden të na bllokojnë për kohë të gjatë sepse atë që ne mësojmë përgjat studimeve tona është zgjidhja e problemeve – Një artist i vërtetë duhet të vendoset në shërbim të së vërtetës, t’i rezistoj shtypjes dhe të kundërshtojë gënjështrën (Camus. A. Stockholm Dhjetor 1957).

 

Artistët pjesëmarrës në ekspozitë:

Anisa Paturi

Arnilda Kyçyku

Anxhelo Gjonçi

Edinjo Jahja

Egi Xherija

Enea Ziu

Gerta Hoxha

Irma Rexhepi

Kristanja Çene

Kristian Zara

Resina Meçani

Sandra Agaj

Stiven Petoshati

Tedi Braka

Vert

Edi

Leave a Reply

Your email address will not be published. Required fields are marked *